Þórhildur Sunna Ævarsdóttir, þingmaður Pírata, segir að hvorki hún né þingflokkurinn hafi beitt sér gegn lýðræðislega kjörinni stjórn flokksins. Einnig hafnar hún því að hafa brotið persónuverndarlög.
Þetta skrifar Þórhildur í færslu á samfélagsmiðlum. Tilefnið er færsla Atla Þórs Fanndal, fyrrverandi samskiptastjóra, sem sagði að þingflokkurinn hefði brotið á sér með því að skoða, dreifa og taka fyrir einkasamtöl hópsins um stjórnmálaþátttöku innan Pírata. Gögnum hafi verið dreift á meðal „flokkseigenda“ og grafið undan réttkjörinni stjórn.
„Undanfarið hefur fyrrverandi samskiptastjóri þingflokks Pírata endurtekið lýst óánægju sinni með þingflokkinn í fjölmiðlum í kjölfar þess að honum var sagt upp störfum,“ segir Þórhildur. Segir hún trúnaðarbrest hafa orðið í starfssambandinu og hefðbundin vinnuréttarleg sjónarmið hafi legið að baki uppsögn fyrrum starfsmanns þingflokksins.
„Ég ítreka að hvorki ég né þingflokkur Pírata höfum beitt okkur gegn lýðræðislega kjörinni stjórn félagsins, hvað þá reynt að steypa henni af stóli,“ segir hún en geti ekki tjáð sig um mál einstakra fyrrum starfsmanna. „Því fer fjarri að ég eða aðrir í þingflokki Pírata hafi farið á svig við persónuverndarlög. Umrædd skjáskot, sem bárust þingflokknum og minnst hefur verið á í fjölmiðlaumfjöllun, fóru ekki í nokkra dreifingu eins og ranglega hefur verið haldið fram.“
