„Það hefur víst ekki farið framhjá neinum að kosningabaráttan er hafin,“ segir Inga Sæland formaður Flokks fólksins í stuttu myndbandi núna seinni partinn.
Segist Inga koma aðeins koma stutt inn þar sem mikið sé að gera hjá Flokki fólksins.
„Ég er bara að koma til að senda kærleikskveðju til Össurar Skarphéðinssonar og vina hans í Samfylkingunni. Það er í rauninni dapurt að sjá eðli þeirra gjósa hér upp með rógburði, illmælgi og einhverju sem á sér enga stoð í raunveruleikanum. Össur Skarphéðinsson er ekki regluvörður Flokks fólksins, hann veit ekkert um innra starf Flokks fólksins, hann veit ekkert um hversu lýðræðislegt og fallegt starf Flokks fólksins er.
Fyrr í dag greindi DV frá skoðun Össurar þar sem hann sakaði Ingu um valdníðslu, eftir að ljóst er að Jakob Frímann Magnússon og Tómas Tómasson þingmenn Flokks fólksins, verða ekki í alþingiskosningum sem framundan eru 30. nóvember.
„Opinber brottrekstur Jakobs Frímanns (og Tomma í Búllunni) úr framboði er ekki aðeins ólýðræðislegur gjörningur hjá leiðtoga sem alltaf er með túlann fullan af lýðræðishjali heldur hreinasta valdníðsla af hennar hálfu. Það sést gjörla þegar rennt er yfir einföld og skýr lög Flokks fólksins á heimasíðu hans,“ segir Össur meðal annars.
Inga segir í myndbandinu sýni að Össur hafi ekki hugmynd um:
„Hversu smurð og falleg okkar kosningavél er og hvað við höldum þétt utan um hvert annað í allri okkar baráttu. Þannig að ég segi bara:
„Áfram veginn og Össur Skarphéðinsson líttu þér nær og hugaðu að þinni eigin kosningabaráttu og lofaðu öðrum að fá að vera í friði sem finna gull á alveg nýju miði. Áfram veginn.““
