Hannes Sigurbjörn Jónsson, framkvæmdastjóri Körfuknattleikssambands Íslands, ætlar að bjóða fram krafta sína fyrir Samfylkinguna, en hann studdi áður Sjálfstæðisflokk og sat í 14. sæti á lista flokksins í Reykjavíkurkjördæmi suður  í Alþingiskosningunum 2013.

Hannes segir í fréttatilkynningu: „Eftir allmargar áskoranir undanfarið ár hef ég tekið þá ákvörðun að bjóða fram krafta mína fyrir Samfylkinguna. Ég gef kost á mér á framboðslista flokksins í Norðvesturkjördæmi í kosningunum 30. nóvember næstkomandi og sækist ég eftir því að vera í öðru af tveimur efstu sætum listans.“

Líklega komi það sumum á óvart að hann, fyrrum Sjálfstæðismaðurinn, sé kominn yfir í Samfylkinguna.

„Það má kannski segja að ég hafi verið landlaus krati í flokki sem ég var á báðum áttum með hvort ég ætti heima í eða ekki. Núna er nokkuð síðan að ég sagði skilið við Sjálfstæðisflokkinn. Og staðreyndin er einfaldlega sú að Sjálfstæðisflokkurinn hefur þrengst á meðan Samfylkingin hefur breikkað og opnað faðminn.

Með nýrri forystu Samfylkingar hefur flokkurinn hrist upp í pólitíkinni og fært jafnaðarflokkinn aftur nær fólkinu í landinu. Ég tel að við sem þjóð þurfum á traustri forystu að halda á þessum tímum sem við lifum. Samfylkingin býður upp á opinská stjórnmál og nýtt upphaf fyrir Ísland. “

Hannes segist hafa mikla trú á samfélagi og þjóð, en mikið þurfi að laga og bæta. Hann telur að reynsla hans úr körfuboltanum og íþróttahreyfingunni muni gagnast honum vel, en þar eru mismunandi skoðanir leiddar til lykta með samtali, samvinnu og samsamstarfi.

„Mín helstu áherslumál eru eftirfarandi:

• • • að vera fulltrúi fólksins – ég lít á þingmennskuna sem þjónustuhlutverk við almenning og alla íbúa Norðvesturkjördæmis,
  • • íþróttir og æskulýðsmál,
  • • málefni unga fólksins okkar í dag á víðum grunni,
  • • heilbrigðismál – ekki síst jafnt aðgengi óháð búsetu,
  • • samgöngumál
  • • og að vera traustur fulltrúi Norðvesturkjördæmis, eiga virkt samtal við fólkið í kjördæminu og finna leið til að geta verið í sem mestum samskiptum við sem flesta á svæðinu á hverju tíma.“

Hannes segist stoltur af því að búa í landi þar sem fólk fær að skiptast á skoðunum og kjósa þann flokk og einstaklinga sem þjóðin telur best til þess fallna á hverjum tíma til að leiða þjóðina áfram.

„Við Samfylkingarfólk stefnum á að ná inn tveim þingmönnum að lágmarki hér í Norðvesturkjördæmi og þurfum því á stuðningi þínum að halda til að breytingar verði á stjórn landsins.

Ég er afar þakklátur fjölskyldu minni og nánasta vinahring fyrir ráðgjöf, spjall og pælingar undanfarna mánuði varðandi þessi næstu skref hjá mér á pólitíska sviðinu.

Ég er til þjónustu reiðubúinn fyrir Ísland, fólkið í landinu og hlakka til að vinna að hagsmunum okkar íbúa Norðvesturkjördæmi.“