Viðreisn hefur ákveðið að fara í uppstillingu í stað prófkjörs í komandi kosningum. Þetta staðfestir Þorbjörg Sigríður Gunnlaugsdóttir, oddviti Viðreisnar í Reykjavík. Ákvörðunin var tekin á fundi í fyrrakvöld, sem gerir það að verkum að hugmyndir Jóns Gnarr um að bjóða sig fram í prófkjöri gegn Þorbjörgu eða Hönnu Katrínu verða ekki að veruleika.

Þetta kemur fram í nýjum þætti hlaðvarpsins Ein Pæling.

Þorbjörg segir að sú ákvörðun að fara í uppstillingu eigi sér stað vegna stöðu mála í öllum stjórnmálaflokkum eftir að Bjarni Benediktsson, formaður Sjálfstæðisflokksins, sleit óvænt stjórnarsamstarfinu. „Allir flokkar eru að glíma við það sama vegna skyndikosninga. Það var ákveðið í gær að Viðreisn myndi beita uppstillingu um allt land, og það verður spennandi að sjá hvernig listarnir skipast,“ segir Þorbjörg.

Jón Gnarr hafði nýlega lýst því yfir að hann hugðist etja kappi í prófkjöri um oddvitasæti í Reykjavík fyrir Viðreisn, sem vakti mikla umræðu. Með þessari stefnubreytingu er þó ólíklegt að honum verði stillt svo hátt á lista.

Þorbjörg lýsir mikilli virðingu fyrir Jóni Gnarr og segir hann vera mikinn happafeng fyrir flokkinn. Hins vegar segist hún hafa talið að markmiðið væri að halda sameiginlegt prófkjör fyrir bæði Reykjavíkurkjördæmin, eins og aðrir flokkar hafa gert. „Ég leit þannig á að planið væri að það yrði eitt sameiginlegt prófkjör fyrir bæði Reykjavíkurkjördæmin, sem er það módel sem þeir flokkar hafa verið með sem að hafa á annað borð verið með prófkjör í Reykjavík, að það séu engin rök fyrir tveimur prófkjörum. Mér finnst að við séum þar að velja þann leiðtoga í Reykjavík sem getur komið okkur í ríkisstjórn,“ segir Þorbjörg og bætir við að hún hefði verið meira en tilbúin til þess að taka slaginn.

Auk Þorbjargar og Jóns Gnarr hefur Hanna Katrín Friðriksson, þingflokksformaður Viðreisnar, lýst því yfir að hún vilji leiða lista flokksins í öðru hvoru Reykjavíkurkjördæminu.