Kappræður forsetaframbjóðanda hófust á RÚV kl. 19.40 í kvöld. Umræðunum í kvöld er skipt í tvo hluta.
Í fyrri hlutanum mætast sex efstu frambjóðendurnir miðað við könnun Gallup í dag og í síðari hlutanum mætast hinir sex sem mælast með undir 5% fylgi. Í fyrri hlutanum mættu því Arnar Þór Jónsson, Baldur Þórhallsson, Halla Hrund Logadóttir, Halla Tómasdóttir, Jón Gnarr og Katrín Jakobsdóttir.
Þáttastjórnendur sögðu að svo væri að heyra sem Jóni Gnarr fyndist forsetaembættið ekki valdaembætti. „Þú lýsir sjálfum þér fyrst og fremst sem stemningsmanni, sem eigi að fylgja tíðarandanum í þjóðmálaumræðunni. En hvað ef raunverulega reynir á þig í embætti forseta til dæmis stjórnarkreppa í landinu, meiriháttar hamfarir eða ófríður, er nóg að vera stemningsmaður í þannig aðstæðum?
Var Jón á því að fréttamaður væri að meina í pólitísku samhengi. „Þið voruð að spyrja mig, leyfið mér að svara,“ sagði Jón þegar þáttastjórnendur gripu fram í fyrir honum. „Það getur reynt á forseta á svo margan annan hátt en á pólitískan hátt. Þessi umræða um forsetaembættið að þetta sé embætti þar sem þú klippir á borða nema í undantekningartilfellum þar sem koma upp pólitískar krísur þá fyrst reynir á þig. Það reynir á forseta að standa með íslenskri þjóð í alls konar aðstæðum. Ég myndi alveg treysta mér að standa með íslenskri þjóð eða reyna að hjálpa við að leysa úr pólitískum vanda sem kæmi upp. Ég myndi algjörlega treysta mér til þess. Ég hef starfað áður í pólitík og hræðist ekki neitt.“
Benti Jón á að hann hefði í pólitík tekið óþægilegar ákvarðanir og hefði ásamt öðrum endurreist Orkuveitu Reykjavíkur. Sagðist hann aðspurður ekki bara hafa hækkað gjaldskrána og hvatti þáttastjórnanda til að kynna sér málið betur.
„Það erfiðasta sem ég hef nokkurn tíma á ævinni þurft að gera og vona að enginn þurfi að gera,“ sagði Jón um uppsagnir tengdar Orkuveitunni. „Standa með fólki í persónulegum krísum reynir á.“
Skiptar skoðanir eru um svar Jóns á X:
Ólík viðbrögð #forseti24 pic.twitter.com/UvTcXNG1mm
— Birkir (@birkirh) May 31, 2024
Jón Gnarr háttaði bara þáttastjórnendur í beinni.
— Rikki G (@RikkiGje) May 31, 2024
Í fyrsta sinn sem Jón Gnarr hefur heillað mig í þessari kosningabaráttu. Lætur ekki hanka sig. Fastur og fylginn sér. Elska það #Forseti24
— Maggi Peran (@maggiperan) May 31, 2024
