Jón Gnarr, fyrrum borgarstjóri og núverandi forsetaframbjóðandi, segist búast við því að Katrín Jakobsdóttir fái harða gagnrýni fyrir framboð sitt til sama embættis enda sé það „svolítið umhugsunarvert “ að manneskja með það forskot sem hún hefur umfram aðra blandi sér í baráttuna um embættið með þessum þætti. Þetta kemur fram í athyglisverðu viðtali við Jón í Heimildinni sem birtist nú um helgina.
„Ég veit ekki betur en að forsætisráðherra sé í stanslausum ferðum um landið sem forsætisráðherra sem margt af þessu fólki er að reyna að safna pening til að geta gert. En hún hefur verið á vegum ríkissjóðs að gera það. Ég held að það mætti alveg skoða að telja það sem ákveðna kosningabaráttu sem væri þá ekki alveg ærleg. Það væri þá falin kosningabarátta. En svo þarf það ekkert að vera þannig,“ segir Jón og telur þetta umhugsunarvert út frá siðferðilegu og lýðræðislegu sjónarmiði.
„Ég á ekki von á öðru en að Katrín muni fá harða gagnrýni einmitt fyrir þetta. Ég held að það gæti orðið svolítið þungur róður. Það þarf þó ekkert að vera algjörlega rangt að sitjandi forsætisráðherra bjóði sig fram til forseta. Það getur alveg verið að það sé algjörlega brilljant. Mér finnst að minnsta kosti spennandi að vera hluti af þeim kosningum sem það gerist,“ segir borgarstjórinn fyrrverandi.
Hér má lesa viðtalið við Jón í heild sinni í Heimildinni.
