Björn Berg Gunnarsson, fjármálaráðgjafi og fyrrverandi yfirmaður greiningar- og fræðslumála Íslandsbanka, segir að þótt krónan sé um þessar mundir heilbrigð og hraust sé ekki hægt að treysta því að svo verði alltaf.

Björn Berg er viðmælandi Ólafs Arnarsonar í hlaðvarpi Markaðarins á Eyjunni.

Markaðurinn - Björn Berg - Gjaldmiðillinn

Björn segist telja það mjög heilbrigt fyrir okkur að velta stanslaust fyrir okkur þeim möguleika að taka upp annan gjaldmiðil til að tryggja stöðugleika hér á landi vegna gallanna á krónunni.

Kaupmátturinn hefur aukist alveg gríðarlega hér á landi og við höfum það mjög gott, betra en flestar aðrar þjóðir en Björn segir mikilvægt að velta fyrir sér hvort það sé beinlínis vegna krónunnar.

Stóra spurningin eigi að vera hvort krónan sé forsenda velmegunar hér.

„Við verðum að passa okkur að tengja þetta við rétta hluti,“ segir Björn og bætir við að hann sé ekki vissum að það að við séum sérstök sem eyja sem byggir eingöngu á útflutningi þýði endilega að við þurfum að vera með okkar eigin mynt. „Ég er alls ekkert sammála því. ég hef ekkert á móti krónunni ef við högum okkur þannig í sambandi við hana og sníðum þannig leikreglur í kringum hana að hún verði stöðug.“

Hann viðurkennir að okkur hafi ekki gengið vel með það í gegnum tíðina en segir núna hafa verið nokkuð langt tímabil þar sem krónan hafi frekar hjálpað okkur en hitt. Núna sé hún mjög heilbrigð og hraust og sé að hjálpa okkur. „En ég treysti því ekki að það verði alltaf þannig,“ segir Björn.