Leikkonan Aldís Amah Hamilton er ný rödd Vodafone. Hún tekur við hljóðnemanum af Vali Frey Einarssyni sem hefur talað fyrir vörumerkið í auglýsingum síðastliðin ár.

„Við erum verulega ánægð að fá Aldísi Amah inn sem nýja Rödd Vodafone. Hún smellpassar við nýjan tón vörumerkisins. Svo er líka gaman að brjóta löngu tímabært blað, en Aldís er fyrsta konan sem er föst vörumerkjarödd fyrir fjarskiptafélag á Íslandi,“ segir Lilja Kristín Birgisdóttir, forstöðumaður markaðs og samskiptamála hjá Vodafone.

Aldís Amah hefur verið að gera það gott í leiklistinni og var meðal annars tilnefnd sem leikkona ársins í aðalhlutverki á Eddu verðlaununum 2023 fyrir hlutverk sitt í spennuþáttaröðinni Svörtu sandar.

„Vodafone var mitt fyrsta símafyrirtæki. Ég er meira að segja enn þá með sama númerið. Ég er spennt og þakklát fyrir traustið. Það er mikil gjöf að fá að taka við af Vali og mun gera mitt besta til að fylla í hans flottu fótspor,“ segir Aldís Amah.