Árnastofnun sem kennd er við bókasafnarann Árna Magnússon og Veröld eða Hús Vigdísar Finnbogadóttur standa ekki langt frá hvort öðru á háskólalóðinni. Árni hefur alltaf verið umdeildur í Íslandssögunni. Hann safnaði miklu magni af handritum en stór hluti þeirra dýrgripa glataðist í umsjá Árna vegna bruna eða skipsskaða. Sennilega týndi Árni fleiri handritum en hann safnaði svo að lífsverk hans snerist upp í andhverfu sína.

Vigdís er á hinn bóginn óumdeild enda segir stór hluti þjóðarinnar að hún hafi kennt þeim frönsku. Nýrisið hús íslenskunnar ber nafnið Edda í anda Snorra Sturlusonar og Sæmundar fróða. Þrír tengdasynir Snorra og einn stjúpsonur tóku sig saman um að drepa hann haustið 1241. Hann var því ekki sá vinsælasti í fjölskylduboðunum. Sæmundur hefur orðið frægastur fyrir samskipti sín við skrattann.

Það er mikið fagnaðarefni að fljótlega mun bætast við Grimsson center í Vatnsmýrinni utan um lífsverk fyrrum forseta lýðveldisins. Hann var alltaf umdeildur eins og aðrir á svæðinu umkringdur drísildjöflum sem gerðu honum lífið leitt. Stundum hefði hann þurft að búa yfir mætti Sæmundar fróða til að kveða niður smápúka og hrokafulla pistlahöfunda.

Mig dreymdi Egil afa minn Skallagrímsson á dögunum. Hann fór með þessa gömlu vísu Sveins í Elevogum og krafðist þess að hún yrði meitluð í stein við innganginn að Grimsson center á íslensku og ensku.

Ættarsvip af Agli ber hann.
Orðaleikni Grettis sterka.
Spaki Njáll til anda er hann.
Ólafur pá til rausnarverka.

Related to Egill
Outspoken as Grettir
Intelligent as Njall
Elegant as Olafur pá.

Ég kem þessu hér með á framfæri eins og öðrum skilaboðum Egils Skallagrímssonar til þjóðar sinnar.