Joe Biden, forseti Bandaríkjanna, tjáði gestum á fjáröflunarfundi Demókrataflokksins í gær að hann væri ekki viss um að hann myndi sækjast eftir endurkjöri í forsetakosningunum á næsta ári ef Donald Trump hefði ekki boðið sig fram.
Þetta kemur fram í frétt CNN en eins og kunnugt er hefur verið mikið rætt um hvort forsetinn sé ekki orðinn allt of gamall til að bjóða sig fram til endurkjörs en hann er 81 árs.
„Ef Trump væri ekki í framboði þá er ég ekki viss um að ég væri í framboði,“ sagði forsetinn.
Hann bætti því við að Demókratar mættu ekki láta Trump vinna kosningarnar.
Fundurinn fór fram í íbúðarhúsi í Boston. Samkvæmt heimildum CNN komu ummælin starfsliði forsetans í opna skjöldu.
Talsmenn framboðs Biden gerðu lítið úr ummælunum og sögðu að Biden hefði alltaf lýst Trump sem sérstakri ógn við Bandaríkin og hann hefði viðhaft samskonar ummæli í framboði sínu vegna kosninganna 2020.
Allt virðist stefna í að Donald Trump muni verða forsetaefni Repúblikana í forsetakosningunum á næsta ári.
Chris Coons, öldungadeildarþingmaður Demókrata fyrir Delaware ríki, er einn af kosningastjórum Biden. Hann sagði við CNN að Biden líti réttilega á Trump sem ógn við lýðræðið í Bandaríkjunum:
„Biden forseti hefur unnið Trump áður og hann mun gera það aftur.“
Biden dró þó úr ummælum sínum síðar sama dag þegar fréttamenn spurðu hann hvort hann myndi ekki bjóða sig fram til endurkjörs ef Trump væri ekki í framboði:
„Ég býst við því en sjáið þið til hann er í framboði og ég verð að bjóða mig fram.“
Framboð Bidens stendur nú í mikilli fjáröflun en það mun leita til bæði fjársterkra aðila og horfa til smærri framlaga og treysta á starf sjálfboðaliða við að afla fjár.
Alls mun Biden vera viðstaddur á 7 fjáröflunarsamkomum í þessari viku og fleiri eru á dagskránni síðar í þessum mánuði. Talið er mögulegt að framboð hans til endurkjörs muni kosta milljarð dala (rúmlega 139 milljarðar íslenskra króna). Hann hefur átt erfitt með að halda vinsældum á þessu kjörtímabili og margir kjósendur efast um að það borgi sig að greiða forsetanum atkvæði sitt til að tryggja honum annað kjörtímabil.
Á öðrum fjáröflunarfundi sagði Biden að Trump hefði ekkert farið í grafgötur með hvað hann ætlaði sér að gera ef hann nær kjöri.
Í ræðu í síðasta mánuði sagði Trump: „Við munum losa okkur við kommúnista, marxista, fasista og róttæka vinstri rudda sem lifa eins og meindýr í landinu okkar.“
Trump bætti við:
„Hin raunverulega ógn er ekki frá róttæka hægrinu. Hin raunverulega ógn er frá róttæka vinstrinu og hún fer vaxandi með hverjum degi sem líður.“
