Björn Ingi gerir þetta að umtalsefni í einskonar uppgjörsgrein á Viljanum eftir að Alþingi fór í jólafrí sem stendur til 22. janúar næstkomandi.
Hann segir það vekja athygli að utan EES-mála og málefna tengdum fjárlögum hafi stjórnarflokkarnir náð nánast engu fram fyrir jólafrí. Þannig hafi stóra málinu um lög vegna neyðarástands í raforkumálum skyndilega verið kippt til baka á laugardag og afgreiðslu frestað fram yfir áramót.
Björn Ingi segir þetta minna á lokadaga þingsins í fyrravor þegar ágreiningur innan stjórnarliðsins var öllum ljós og mörg brýn stjórnarfrumvörp dregin til baka.
„Stjórnar- og stjórnarandstöðuþingmenn sem Viljinn hefur rætt við undanfarna daga, viðurkenna að staðan sé furðuleg og erfitt sé að þetta gangi svona mikið lengur. Innbyrðisátök, misvel falin, taka mesta orku stjórnarliða og fyrir vikið er þjóðfélagið allt að líða fyrir kyrrstöðupólitíkina sem ræður ríkjum. Það sem eitt sinn átti að vera breitt stjórnarsamstarf þvert frá vinstri til hægri og yfir miðju stjórnmálanna með stuðning alls þorra almennings, hefur snúist upp í átakahóp sem litlu fær áorkað og horfir fram á fylgishrun frá mánuði til mánaðar,“ segir hann í pistli sínum.
Hann segir að þingmenn úr öllum flokkum segist alls ekki útiloka að stjórnin springi snemma á nýju ári.
„Þrjú hjól undir bílnum, en áfram skröltir hann þó,“ var eitt sinn sungið og á vel við nú um ríkisstjórn Katrínar Jakobsdóttur. Vandinn er að fleiri hjól eru við það að hrynja undan bílnum og að óbreyttu mun hann lenda úti í skurði. Það er óumflýjanlegt.“
