Jódís Skúladóttir, þingmaður Vinstri grænna, bendir á að feitar konur séu í slæmri stöðu og neikvæður fókus hafi verið á holdafar kvenna í færslu á Facebook. Fleiri karlar séu hins vegar í ofþyngd á Íslandi.

„Vissuð þið að Íslendingar eru meðal feitustu þjóða OECD,“ segir Jódís í færslunni. Viðkvæmt sé að ræða offitu en það verði að gera það. Alvarlegur heilsufarsvandi sé yfirleitt fylgifiskur offitu. Sýna þurfi þó nærgætni í umræðunni um hana.

„En smellum upp kynjagleraugunum. Um feitar konur sungu bæði Laddi og Kátir piltar á sínum tíma og gríðarlegur og neikvæður fókus hefur verið á holdafar kvenna,“ segir Jódís. „Konur í yfirþyngd fá lakari heilbrigðisþjónustu og eiga færri tækifæri á vinnumarkaði. Feitir karlar fá líka lakari þjónustu og færri tækifæri en þeir eru samt í margfalt betri stöðu þökk sé feðraveldinu.“

Staðreyndirnar séu hins vegar þær að fleiri karlar glími við offitu en konur.

„Það sem mér þykir áhugavert miðað við alla umræðuna og sölutrixin sem samfélagið sérhannar fyrir feitar konur (og konur sem eru ekki feitar en er sagt að þær séu það) er hvað ég og eflaust mörg önnur hafa ranghugmyndir varðandi stöðu kynjanna í þessum málum,“ segir hún. 68 prósent íslenskra karla eru í ofþyngd, það er með BMI stuðul 30 eða hærri en aðeins 50 prósent íslenskra kvenna.