Vilhjálmur Birgisson, formaður Starfsgreinasambandsins, segir að honum þyki það undarlegt ef heimilin verða látin greiða fyrir byggingu varðargarða í kringum þjóðhagslega mikilvæga innviði.

Nefnir hann HS Orku í Svartsengi í því samhengi, orkufyrirtæki sem skilað hefur mörgum milljörðum í hagnað síðustu ár.

Gjaldið taki mið af brunabótamati

Katrín Jakobsdóttir forsætisráðherra hefur lagt fram frumvarp um vernd mikilvægra innviða á Reykjanesskaga. Samkvæmt frumvarpinu er áætlaður kostnaður við uppbyggingu varnargarðs við Svartsengi um 2,5 milljarðar króna.

Til stendur að fjármagna þetta með gjaldi, svonefndu forvarnagjaldi, sem myndi leggjast á allar húseignir næstu þrjú árin og nemur 0,08% af brunabótamati. Svo dæmi séu nefnd myndi gjaldið nema 4.800 kr. á ári af íbúð með brunabótamat að fjárhæð 60 milljónir króna og 8.000 krónur á ári af íbúð með brunabótamat að fjárhæð 100 milljónir króna.

Undarleg skattlagning

Vilhjálmur segir á Facebook-síðu sinni að ekki sé nokkur ágreiningur uppi um nauðsyn þess að byggja varnargarða í kringum mikilvæga innviði sem lúta að HS Orku. Gríðarlegir hagsmunir séu í húfi fyrir Suðurnesjabúa alla og samfélagið allt.

„Það sem mér finnst hinsvegar undarlegt er að það eigi að setja sérstakan skatt á öll heimili næstu 3 árin til að fjármagna þessa varnargarða. Vil koma því algerlega á hreint að að sjálfsögðu á ríkið að sjá um fjármögnun á þessum varnargarði en ég skil alls ekki af hverju HS orka eigi ekki að vera þeir aðilar sem endurgreiða ríkinu kostnað við þær framkvæmdir.“

18 milljarða hagnaður frá 2017

Vilhjálmur bendir á að HS Orka hafi skilað rúmum 18 milljörðum króna í hagnað frá árinu 2017. Veltir hann fyrir sér „hví í ósköpunum“ ríkið geti ekki gert þá lágmarkskröfu á eigendur fyrirtækisins að þeir endurgreiði þann framkvæmdakostnað sem hlýst af byggingu varnargarðs.

„Ég ítreka að að sjálfsögðu verðum við að byggja varnargarða í kringum þjóðhagslega mikilvæga innviði og ríkið þarf og verður að koma að þeirri fjármögnun en að ætla sér síðan að láta heimilin greiða fyrir það á sama tíma og HS orka hefur skilað milljörðum í hagnað ár eftir ár finnst mér undarlegt,“ segir hann og varpar þeirri spurningu fram hvort þetta sýni ekki og sanni að svona þjóðhagslega mikilvægir innviðir eins og orkufyrirtæki þurfi og verði að vera í eigu þjóðarinnar.

Vilhjálmur segir að lokum að það sé engin spurning að íslenska þjóðin standi með Grindvíkingum og öllum þeim sem búa á Suðurnesjum í þessum miklu hamförum sem nú dynja yfir. Þjóðin muni halda áfram að standa við bakið á íbúum svæðisins.

„Hinsvegar má ekki láta erlend fyrirtæki hagnast gríðarlega og leggja síðan byrðar á skattgreiðendur án þess að þeir komi þar nærri.“