Samtök atvinnulífsins birtu tilkynningu á vef sínum snemma í morgun með fyrirsögninni „Réttindi og skyldur atvinnurekenda þegar náttúruhamfarir stöðva rekstur.“
Í tilkynningunni minna SA fyrirtæki í Grindavík á að á meðan á náttúruhamförum stendur þá beri fyrirtækjum ekki skylda til að greiða starfsfólki laun á meðan ástandið varir. Rétt er að geta þess að SA bendir á að enginn ágreiningur er um að það sé heimilt þegar að um ófyrirséð ytri atvikin eins og náttúruhamfarir er að ræða. Ef fyrirtæki hætta að greiða starfsfólki laun í slíkum tilfellum þá mun það geta sótt í almannatryggingar.
Setningin „Grindavík – við erum til staðar“ er sú fyrsta sem netverjar sjá þegar vefur SA er opnaður. Þar kemur fram að „SA liðsinna aðildarfyrirtækjum í því óvissustigi sem nú ríkir í Grindavík. SA leggja áherslu á að vera fyrirtækjum innan handar hvað varðar réttindi og skyldur gagnvart starfsmönnum, fylgjast með og miðla upplýsingum frá viðeigandi aðilum ásamt því að vera í sambandi við stjórnvöld. Atvinnulífið mun finna fyrir þessum hamförum og afleiðingum þeirra eins og samfélagið allt. Nú reynir á samstöðu þjóðarinnar.“
Fyrirtæki í Grindavík og hlutaðeigandi eru minnt á upplýsingafund SA sem hefst kl. 14 í dag og boðaður var í tölvupósti til forsvarsmanna. Jón Örvar Bjarnason, sviðsstjóri vátryggingasviðs Náttúruhamfaratrygginga og Ragnar Árnason, forstöðumaður vinnumarkaðssviðs SA fara þar vel yfir stöðuna.
Hér má nálgast svör við algengum spurningum um réttindi og skyldur atvinnurekenda í náttúruhamförum. Að lokum kemur fram að síðan verði í stöðugri uppfærslu á næstu dögum og vikum.
