Þingmaður Framsóknar hefur áhyggjur af því að Seðlabankinn skilji ekki hlutverk sitt og líti svo á að hann sé stikkfrí þegar kemur að húsnæðismálum í landinu. Þetta geti haft alvarlegar afleiðingar.

Í aðsendri grein á Eyjunni skrifar Ágúst Bjarni Garðarsson, þingmaður framsóknar og varaformaður efnahags- og viðskiptanefndar Alþingis, að hann hafi áhyggjur af sýn Seðlabankans þegar kemur að stöðunni á húsnæðismarkaði.

Hann segir innviðaráðherra hafa lagt út í mikilvægar aðgerðir til að auka húsnæðisuppbyggingu en aðgerðir Seðlabankans hafi mjög letjandi áhrif á framkvæmdaaðila „þar sem kaupendum hefur verið gert erfiðara um vik með að komast inn á markaðinn, vegna hertra lánþegaskilyrða, og fjármögnun nýframkvæmda er orðin dýrari. Þvert á það sem við þurfum nú, og þegar allt er saman tekið, þá hefur þetta letjandi áhrif á framkvæmdaaðila til að halda áfram að framkvæma íbúðir. Ég hef verulegar áhyggjur af sýn Seðlabankans þegar kemur að stöðunni á húsnæðismarkaði og það virðist vera að bankinn haldi að hann sé eyland þegar að þessum málum kemur og það sé allra annarra að leysa úr stöðunni. Það er bara ekki svo einfalt, því allt hangir þetta saman,“ skrifar Ágúst Bjarni.

Hann lýsir áhyggjum sínum af því að við kunnum að lenda á sama stað og árin eftir hrun þegar framkvæmdir stöðvuðust nánast sem leiddi síðar til umframeftirspurnar og segir okkur Íslendinga þekkja afleiðingarnar af slíku of vel.

Grein Ágústs Bjarna í heild má lesa hér.