Óttar Guðjónsson, framkvæmdastjóri Lánasjóðs sveitarfélaga, segir sjóðinn síður en svo vera með allt litrófið þegar kemur að samspili milli binditíma fjármögnunar hans og útlána. Áhættufælni og íhaldssemi séu ráðandi, nokkuð sem ekki hafi verið hjá Íbúðalánasjóði og hafði alvarlegar afleiðingar. Óttar er gestur Ólafs Arnarsonar í hlaðvarpi Markaðarins.

M arkaðurinn - Óttar Guðjónsson - Við erum svakarlega leiðinleg með þetta.mp4

„Við erum alveg svakalega leiðinleg með þetta. Við endurlánum til sveitarfélaganna alveg nákvæmlega eins og við tökum að láni sjálf,“ segir Óttar.

Þess vegna sé ekki binditímaáhætta hjá Lánasjóði sveitarfélaga. „Menn sjá þá áhættu raungerast hjá Íbúðalánasjóði í sinni verstu mynd. En það er þetta sem gerir það að verkum að við getum rekið lánasjóðinn á hagkvæman en samt öruggan hátt. Við lánum bara eins og við tökum að láni og þetta streymir bara beint í gegn.“

Óttar segir sveitarfélögin ekki alltaf alveg sátt við þetta. „Þeim finnst þetta stundum leiðinlegt. Þeim finnst stundum leiðinlegt að geta ekki greitt upp lánin og tekið ný á lægri vöxtum.“

Í tilfelli Íbúðalánasjóðs fjármagnaði sjóðurinn sig til langs tíma með óuppgreiðanlegum lánum og lánaði út með uppgreiðsluheimild.

„Það eru alveg leiðir til þess að stýra þessari áhættu,“ segir Óttar. „Án þess að ég vilji fara of mikið út í það þá eru leiðir til að stýra þessari áhættu. Ég held að þær hafi bara ekki verið farnar. Það sem hefði þurft að gera þegar lánin eru greidd upp var að kaupa til baka eigin skuldabréf en það var ekki gert. Þú þarft að stýra útistandandi áhættunni með virkum hætti ef þú ætlar að gera þetta.“