Leiðarahöfundur Morgunblaðsins vandar ríkisstjórninni ekki kveðjurnar í leiðara blaðsins í dag. Ætla má að Davíð Oddsson haldi þar á penna.

Yfirskrift leiðarans er „Hálfkák ríkisstjórnarinnar“.

Leiðarinn byrjar raunar á hrósi til ríkisstjórnarinnar fyrir að ætla að takmarka launahækkanir æðstu embættismanna við 2,5 prósent.

Leiðarahöfundi þykir lítið til koma að fyrirhugað sé að sparnaður til að sporna við þenslu er fyrirhugaður „heilir 36 milljarðar króna“. segir hann þetta vera um þriðjung þess sem Alþingi hækkaði fjárlögin í meðförum sínum í vetur.

Segir höfundur jákvætt að frumjöfnuður stefni í að vera jákvæður en bendir á að á móti hefur vaxtabyrði ríkissjóðs þyngst verulega.

„En þetta snýst ekki aðeins um afkomu ríkissjóðs, heldur hvað hann hefur umleikis, hvernig ríkið á sinn þátt og ekki lítinn í að viðhalda þenslu í þjóðfélaginu. Það er átakanlegt að hlusta á innviðaráðherra tala um aðhald í ríkisrekstri fyrir hádegi og 14 ný göng eftir hádegi, en þá verða fjöllin víst búin.“

Þá finnur höfundur að því að sveitarfélögunum hafi verið afhentir 5 milljarðar vegna málefna fatlaðra og að 15 milljarðar „fari nær stjórnlaust í málefni hælisleitenda á ári án þess að það megi ræða það nema í hálfum hljóðum.“

Frestun framkvæmda hefði að mati leiðarahöfundar Morgunblaðsins mátt vera til frambúðar en ekki tímabundin og hafi engin áhrif á þessu ári. Sama megi segja um aðgerðir í húsnæðismálum sem óvíst sé hvernig nýtist en taki örugglega langan tíma að hafa tilætluð áhrif.

Þá telur höfundurinn fráleitt að hlaða í þjóðarsjóð til að styrkja áfallaþol ríkissjóðs í framtíðinni. Vandséð sé hvernig þær fyrirætlanir gangist, auk þess sem fimmtungur launa almennings renni nú þegar í lífeyrissjóði.

Í niðurlagi kallar leiðarahöfundur aðgerðirnar smáplástra. Mun betur kæmi tekjulágum og barnafjölskyldum ef virðisaukaskattur á matvöru yrði lækkaður fremur en að „gramsa í millifærslukerfinu“. Eigi að lina húsæðiskreppuna þurfi ríkisvaldið að geta lagt sveitarfélögum línurnar um lóðaframboð og ef taka eigi frá peninga fyrir framtíðina væri nær fyrir ríkið að greiða niður skuldbindingar vegna Lífeyrissjóðs starfsmanna ríkisins en að búa til Þjóðarsjóð. „Og ef ríkið vill draga úr þenslu þá eru hægust heimatökin að draga úr þenslu ríkisins.“

Hér má lesa leiðara Morgunblaðsins í dag.