Gunnar Smári Egilsson, einn stofnenda Sósíalistaflokks Íslands og ritstjóri Samstöðvarinnar, er alls ekki sáttur með miðlunartillögu Aðalsteins Leifssonar ríkissáttarsemjara í kjaradeilu Eflingar og Samtaka atvinnulífsins. Lagt er til að félagsmenn Eflingar og aðildarfélaga SA greiði atkvæði um svipaðan samning og gerður var við Starfsgreinasambandið í lok síðasta árs.

Í færslu sem Gunnar Smári birtir á Facebook-síðu sinni í dag segir hann að það þurfi að „koma fram hverjir þrýstu á“ ríkissáttasemjara.

„Hann talar um stórkostlega vá, en hver var hún? Boðað verkfall í einu fyrirtæki með 360 starfsmenn? Þar sem SA lofar að bæta allan skaða? Hver er eiginlega váin sem kallar á að ríkissáttasemjari brýtur í blað og leggur í fyrsta sinn tilboð fyrirtækjaeigenda fyrir verkalýðsfélag?“

Gunnar Smári segir að umrædd vá sé „augljóslega pólitísk“ en ekki efnahagsleg. Þá veltir hann því aftur fyrir sér hver það var sem þrýsti á Aðalstein. „Hver hringdu í Aðalstein? Var það Katrín eða Bjarni? Halldór Benjamín eða Þorsteinn Már? Hver stjórnar landinu?“ spyr hann.

„Þessi verknaður er svo stórkostleg aðför að lýðræðislegum leikreglum samfélagsins, svo augljóst skref í átta að fasisma (hagsmunum lágstéttanna fórnað í nafni almannareglu, fátækt fólk neitt til að þiggja það sem fyrirtækjaeigendur vilja kast í það) að það verður að koma fram hvernig þetta gat gerst.“