„Þessa dagana berast okkur ótíðindi af orkumálum í Evrópu. Orkuverð rýkur upp og dæmi eru um að fólk fái allt að 200 prósentum hærri reikninga fyrir hita og rafmagni en fyrir ári. Sums staðar stefnir jafnvel í þrefalda hækkun orkuverðs miðað við veturinn á undan. Heimilin, sem verða harðast úti, eru ofurseld þeirri fátæktargildru að hafa hvorki efni á reglulegri upphitun á veturna né kælingu á sumrin.“

Svona hefst grein eftir Ingu Sæland í Morgunblaðinu í dag. Hún ber fyrirsögnina „Nú iða íslensku Orkarnir í skinninu!“.

Segir Inga enga furðu að íslensku Orkarnir kætist en það kallar hún þá auðmenn sem vilja hagnast mjög svo á að selja orku íslensku þjóðarinnar úr landi í gegnum sæstreng. „Þessir Orkar hinnar íslensku Hringadrottinssögu sjá fyrir sér uppgrip í eigin vasa eftir að Alþingi Íslendinga samþykkti orkupakka 3 fyrir þremur árum. Það var misráðið. Að halda því fram að hægt sé að samþykkja orkustefnu ESB en segja NEI við sæstreng, er áþekkt því að samþykkja frjálst flæði vöru en neita að byggja hafnir til að taka á móti vörum,“ segir Inga.

Hún segir að ef Orkunum takist ætlun sín um að selja orku, unna úr íslenskum auðlindum, til Evrópu í gegnum sæstreng megi líkja afleiðingunum við stórslys. Orkuverð til íslensks almennings muni hækka gríðarlega því ekki megi mismuna íbúum á evrópska orkumarkaðnum. Þá muni verða náttúruspjöll og mikil ruðningsáhrif í hagkerfinu. Orkugeirinn muni soga til sín fjármagn og mannafla á kostnað annarra atvinnugreina.