Frumvarp hefur verið lagt fram á Bandaríkjaþingi um breyttar áherslur á Norðurslóðum. Meðal annars er kveðið á um gerð fríverslunarsamnings við Ísland. Katrín Jakobsdóttir, forsætisráðherra, og Þórdís Kolbrún Reykfjörð Gylfadóttir, utanríkisráðherra, fagna frumvarpinu.

Morgunblaðið skýrir frá þessu í dag. Haft er eftir Katrínu að íslensk stjórnvöld hafi lengi þrýst á gerð fríverslunarsamnings á milli ríkjanna og virðist sá áhugi vera gagnkvæmur. Hún sagðist vonast til að nú komist skriður á þessi mál. Þórdís tók í sama streng og sagði jákvætt að finna að Ísland eigi vini á Bandaríkjaþingi. Bandaríkin séu ein helsta vina- og bandalagsþjóð Íslands og vilji sé til að treysta þau bönd.

Fyrrgreint frumvarp snýr að málefnum Norðurslóða og tekur til öryggis, siglinga, rannsókna, fjárfestinga og viðskipta. Markmiðið er að halda rússneskum umsvifum í skefjum.

Morgunblaðið segir að ekki sé vitað hver afdrif frumvarpsins verði en talið sé að það muni njóta velvilja á þingi. Afstaða Joe Biden, forseta, og ríkisstjórnar hans mun þar ráða miklu en ekki er talið að forsetinn og ríkisstjórnin muni beita sér gegn því þar sem frumvarpið fellur vel að stefnu stjórnarinnar í málefnum Norðurslóða.

Nánar er hægt að lesa um málið í Morgunblaðinu í dag.