Rúmlega þrjár vikur eru síðan sveitarstjórnarkosningarnar fóru fram en þó er ekki enn kominn nýr meirihluti í Reykjavík. Það er því ekki enn vitað hver verður næsti borgarstjóri en það verður tilkynnt á blaðamannafundi síðar í dag.
Samkvæmt „öruggum heimildum“ mbl.is er það Dagur B. Eggertsson sem mun halda áfram að vera borgarstjóri en þó aðeins fyrstu 18 mánuðina. Einar Þorsteinsson, oddviti Framsóknar, mun samkvæmt heimildunum taka við borgarstjóraembættinu að þeim tíma liðnum. Þá á Einar að vera formaður borgarráðs fyrsta eina og hálfa árið samkvæmt þessu.
Fólk þarf þó ekki að spekúlera mikið lengur í þessu þar sem stutt er í að þetta allt saman verður staðfest.
Á blaðamannafundi sem haldinn verður við stöðvarstjórahúsið í Elliðaárdal klukkan 15:00 í dag verður nýr meirihluti borgarstjórnar nefnilega tilkynntur. Þar munu oddvitar Samfylkingar, Framsóknar, Pírata og Viðreisnar kynna meirihlutann og málefnasamninginn hans. Þá kemur í ljós hver verður borgarstjóri og einnig hverjir munu taka að sér hvaða áhrifastöður.