Hvar létu Rússar til skara skríða? Þeir hófu umfangsmikla innrás í nótt og beinist hún gegn mörgum borgum, ekki bara í austurhluta landsins. Fréttir hafa borist um sprengingar víða um landið, þar á meðal í höfuðborginni Kiev og milljónaborgunum Kharkiv í austurhluta landsins og Odessa við Svartahafið. New York Times segir að embættismenn hafi tilkynnt um eldflaugaárásir í Dnipro og fréttir hafa borist um árás í Kherson.
Í Donbass segjast aðskilnaðarsinnar, sem njóta stuðnings Rússa, hafa tvo bæi á sínu valdi og ráðist hefur verið á hafnarborgina Mariupol og Kramatorsk.
Hefur orðið manntjón? Að minnsta kosti sjö hafa látist í árásum Rússa og níu eru særðir samkvæmt upplýsingum frá úkraínskum yfirvöldum. Ekki hefur komið fram hvort um hermenn eða óbreytta borgara er að ræða.
Hvað segja rússnesk yfirvöld? Í sjónvarpsávarpi í nótt sagði Pútín að hann hefði gefið fyrirmæli um hernaðaraðgerðir í austurhluta Úkraínu. Hann sagði einnig að Rússar hefðu ekki í hyggju að hernema úkraínsk landsvæði. Hann hótaði einnig öllum sem kunna að blanda sér í hernað Rússa í Úkraínu og sagði að Rússar myndu svara íhlutun samstundis.
Hvernig er brugðist við í Úkraínu? Herlög hafa verið sett og lofthelginni hefur verið lokað. Volodymyr Zelenskij, forseti, segir að Rússar hafi gert eldflaugaárásir á innviði og landamæraverði. Hann hvatti landa sína til að halda sig heima. Þrátt fyrir það er mikill straumur út úr Kiev og langar bílalestir hafa myndast.
Hver eru viðbrögð umheimsins? Joe Biden, Bandaríkjaforseti, segir að „bænir heimsins séu með Úkraínumönnum“ og segir árás Rússa „óréttmæta og tilefnislausa“. Hann lofaði að Bandaríkin og bandamenn þeirra muni bregðast við af festu og í sameiningu. Heimsbyggðin muni gera Rússa ábyrga fyrir stríðinu.
Katrín Jakobsdóttir, forsætisráðherra, og Bjarni Benediktsson, fjármálaráðherra, hafa fordæmt árásina. Það sama hafa Ursula von der Leyen, forseti framkvæmdastjórnar ESB, Emmanuel Macron, Frakklandsforseti, Justin Trudeay, forsætisráðherra Kanada og Boris Johnson, forsætisráðherra Bretlands, gert.