Umboðsmaður Alþingis hefur sent frá sér tvær fyrirspurnir vegna brottvísunar 15 hælisleitenda á dögunum. Annarri fyrirspurninni var beint að kærunefnd Útlendingastofnunar og hinni að ríkislögreglustjóra.

Í bréfinu sem sent hefur verið ríkislögreglustjóra segir umboðsmaður að komið hafi fram í fréttum að einn þeirra sem fluttur var í lögreglufylgd til Grikklands hafi verið fatlaður maður í hjólastól.

„Af frásögn fjölmiðla og myndskeiðum sem birst hafa af umræddu atviki verður ráðið að við flutninginn hafi hjólastóllinn verið tekinn af manninum og hann fluttur í lögreglubíl sem ekki mun hafa verið sérútbúinn með tilliti til þarfa hans.“

Síðan hafi komið fram í viðtali við Helga Valberg Jensson, yfirlögfræðing ríkislögreglustjóra, að skoða þyrfti verklag sem var viðhaft við brottflutninginn og að lögregla ætti að eiga bifreið sem væri útbúin fyrir hjólastól.

Umboðsmanni hafi verið falið að sinna svokölluðu OPCAT-eftirliti á grundvelli valfrjálsrar bókunar við samning Sameinuðu þjóðanna gegn pyndingum og annarri grimmilegri, ómannlegri eða vanvirðandi meðferð eða refsingu.

Óskar Umboðsmaður eftir upplýsingum um hvort og þá hvaða ráðstöfunum ríkislögreglustjóri hafi gripið til vegna málsins.

Í bréfinu til kærunefndar segir að talsmaður eins hælisleitenda gagnrýnt birtingu kærunefndarinnar á úrskurðum sínum. En talsmaður hafi verið staddur erlendis þegar úrlausn var send honum og ekki gat hann nálgast skjalið þar sem rafræn skilríki hafi ekki virkað. Þá hafi frestur til að óska eftir frestun réttaráhrifa verið liðinn þegar hann gat kynnt sér úrlausnina.

Óskar umboðsmaður eftir upplýsingum um framkvæmd kærunefndar er varðar umboð löglærðra talsmanna og hvort og þá hvaða kröfur séu gerðar til forms og efnis umboðs.

Hvort það sé rétt að kærunefnd birti úrskurði almennt eingöngu með rafrænum hætti í aðstæðum þar sem útlendingur nýtur aðstoðar löglærðs talsmanna eða hvort einnig sé boðið upp á annan birtingarkost. Eins upplýsingum um hvernig birtingnum er almennt háttað.

Eins vill umboðsmaður vita hvort kærunefndin kannist við það vandamál að erfitt geti verið að nálgast úrlausnir nefndarinnar með rafrænum hætti erlendis.

Svara er óskað fyrir 30. nóvember