Inga Sæland, alþingismaður og formaður Flokks fólksins, er enn og aftur ósátt við þá stefnu sem yfirvöld hafa starfað eftir í baráttunni við kórónuveirufaraldurinn. Frá upphafi faraldursins hefur Inga viljað ganga lengra en yfirvöld í að loka landinu og njóta frelsis innanlands.
Í nýrri færslu á Facebook-síðu sinni ítrekar Inga þessa skoðun sína og segir forheimsku ráða för.
„Mín skoðun er sú að það sem við hefðum alltaf átt að gera er að njóta þess að vera eyja noruður í ballarhafi og halda öllum innviðum okkar gangandi. Með öðrum orðum, verja okkur gegn veirunni eftir fremsta megni og fá að lifa hér eðlilegu lífi innanlands með fjölskylduknúsum og sameiginlegum hátíðarstundum með fjölskyldu og vinum, með heimsókn til ömmu og afa, með opnum öllum sundlaugum, íþróttarsölum, skólum og skemtunum,“ skrifar Inga.
Sjá einnig: Inga segir að óþolandi hringlandaháttur reynist okkur dýr – „Við erum búin að fá nóg“
Hún segir harma það að fá ekki að upplifa frelsi hér innanlands.
„En nei, valin er leiðin að keyra heilbrigðisþjónustuna í kaf með tilheyrandi hörmungum fyrir svo miklu fleiri en þurfa að nota hana vegna Covid. Ég flokka þessar aðgerðir undir hreina og klára forheimsku og ekkert annað þar sem mannréttindahugtakið er útþynnt með öllu og hin raunverulegu mannréttindi okkar til eðlilegs lífs hér innan lands fótum troðin. Við eigum svo miklu betra skilið en að stjórnvöld hendi veirunni í andlitið á okkur án þess að við fáum rönd við reist. Staðan jafnvel orðin sú að við útskrifum okkur sjálf nú eftir að hafa greinst með veiruna,“ skrifar Inga.
