Hugbúnaðarfyrirtækið Rue de Net hefur ráðið til sín Andra Þór Sigurjónsson til að leiða hóp sérfræðinga sinna í verslunarkerfum. Hann hefur í rúman áratug starfað hjá Högum sem verkefnastjóri á upplýsingatæknisviði og haft umsjón með verslunarkerfum félagsins og ýmsum verkefnum sem tengjast kerfisrekstri og netkerfum.

Andri Þór stundaði nám í verslunarstjórn við Háskólann á Bifröst á árunum 2004–2005, lauk diplómanámi í stefnumótun og mannauðsstjórn frá Háskólanum í Reykjavík 2012 og hefur auk þess sótt fjölda námskeiða gegnum tíðina sem tengjast tölvum og tölvukerfum, bæði hér heima og erlendis.

„Ég byrjaði hjá Bónus 1. janúar 1998, þá 17 ára gamall og hef starfað hjá samsteypunni allar götur síðan. Í fyrstu var ég óbreyttur starfsmaður í verslun, síðan varð ég verslunarstjóri í Bónus 1998–1999, fór þá til Hagkaups og var í nokkur ár áður en ég tók við umsjón tölvukerfa hjá sérvöruverslunum Haga. Frá árinu 2011 hef ég stýrt verkefnum og daglegum tölvurekstri hjá nokkrum af einingum Haga,“ segir Andri Þór.

„Mér fannst vera kominn tími á að breyta til og stíga út úr þessum ramma sem ég hafði verið í þetta lengi. Fljótlega eftir að þessi ákvörðun mín lá fyrir höfðu margir samband, þar á meðal var Rue de Net sem er eitt öflugasta fyrirtækið á sínu sviði hér á landi. Ég hef unnið mikið með þeim í gegnum tíðina og veit því að hverju ég geng og hlakka til að takast á við spennandi verkefni sem bíða mín þar,“ segir hann ennfremur.

Andri Þór hefur þegar tekið til starfa hjá Rue de Net og verður í hálfu starfi fyrst um sinn en flytur sig endanlega yfir þann 1. október nk.