Nýhættur fjármálaráðherra Bretlands, Rishi Sunak, hefur lýst því yfir að hann sækist eftir formannsembættinu í breska íhaldsflokknum og stól forsætisráðherra. Sunak sagði af sér embætti á þriðjudagskvöld, rétt eins og Sajid Javid, heilbrigðisráðherra.
Boris Johnson sagði í gær af sér embætti formanns flokksins en segist ætla að sitja áfram í stóli forsætisráðherra þar til eftirmaður hans í formannsembætti flokksins er fundinn. Hefur sú ákvörðun mælst illa fyrir meðal breskra íhaldsmanna.
Uppsagnir ráðherra úr ríkisstjórninni hafa orðið vegna tíðra hneykslismála þar sem Johnson er álitinn ekki hafa brugðist við vondum fréttum með því að segja sannleikann. Gildir það sérstaklega um afar illa þokkuð drykkjusamsæti sem haldin voru í forsætisráðherrabústaðnum að Downing-stræti 10 í miðjum samkomutakmörkunum kórónuveirufaraldursins. Kornið sem fyllti mælinn var skipun Chris Pincher í embætti varaformanns Íhaldsflokksins en Pincher er sakaður um ítrekaða kynferðislega áreitni gegn karlmönnum.
Í tilkynningu sinni segir Rishi Sunak að þjóðin standi frammi fyrir erfiðum verkefnum og hann hafi fengið nóg af sundrungu. Hann segist vilja beita sér fyrir ábyrgri framgöngu ríkisstjórnarinnar. Í myndbandi sem hann birti með tilkynningu sinni segir Sunak: „Fjölskyldan skiptir mig öllu máli. Og mín fjölskylda veitti mér tækifæri sem aðrir geta aðeins látið sig dreyma um.“
Sunak segist hafa gegnt erfiðasta embættinu sem hægt var að gegna á tíma kórónuveirufaraldursins. Hann segir gildi sín vera óhaggganleg en þau séu ættjarðarás, sanngirni og mikil vinna.
