Í gær tilkynnti Nick Hækkerup, dómsmálaráðherra, að ákveðið hafi verið að láta þrjá sjóræningja lausa en að sá fjórði, sá sem særðist, verði fluttur til Danmerkur þar sem réttað verður yfir honum. Hann hefur legið á sjúkrahúsi í Gana síðustu vikur en var fluttur þaðan í gær og áleiðis til Danmerkur.
Líklegt má telja að Danir muni sitja uppi með einfætta sjóræningjann um ókomna framtíð. Skiptir þar engu þótt hann verði fundinn sekur um sjóránn og dæmdur í fangelsi. Þegar hann hefur lokið afplánun verður væntanlega erfitt að koma honum úr landi því fá ef nokkur ríki vilja taka við sjóræningjum. Þetta fer illa í marga Dani sem telja algjöran óþarfa að Danir sitji uppi með sjóræningja um ókomna framtíð.
Ákveðið var að falla frá ákærum á hendur hinum þremur sjóræningjunum og sleppa þeim lausum. Þeir voru settir í lítinn gúmmíbát í gær, fengu mótor og eldsneyti og nesti, og áttu síðan að koma sér sjálfir í land. Vitað er að þeir náðu í land í gær. Ekki þótti forsvaranlegt að senda þann einfætta með þeim og því verður hann fluttur til Danmerkur og réttað yfir honum þar. Að auki koma alþjóðasamningar, sem Danir eru aðilar að, í veg fyrir að hægt sé að sleppa honum lausum.
Vandi Dana í þessu máli er tilkominn vegna þess að þeir gerðu enga framsalssamninga við ríki við Gíneuflóa um móttöku á sjóræningjum áður en Esbern Snare hélt til gæslustarfa í flóanum.
Danska ríkisútvarpið hefur eftir Carsten Fjord-Larsen, talsmanni sjóhersins, að lík þeirra fjögurra sjóræningja sem féllu í skotbardaganum, séu enn um borð í Esbern Snare.
