Birgir Ármannsson hefur setið á þingi fyrir Sjálfstæðisflokkinn frá árinu 2003. Fyrsta áratuginn sat hann á þingi fyrir Reykjavíkurkjördæmi Suður en árið 2013 skipti hann yfir í nágrannakjördæmið, Reykjavík Norður, þar sem hann hefur þrívegis náð kjöri.
Sjálfstæðismenn grínast oft með það að það sé einhverskonar náttúrulögmál að Birgir nái inn á þing og miðað við úrslit kosninganna í nótt virðist það vera meira en líklegt að svo sé.
Eins og áður segir var Birgir í framboði í Reykjavík Norður árið 2017. Þá hlaut Sjálfstæðisflokkurinn 22,6% fylgi í kjördæminu og þrjá kjördæmiskjörna þingmenn. Guðlaug Þór Þórðarson, Áslaugu Örnu Sigurbjörnsdóttur auk Birgis.
Á sama tíma var Sjálfstæðisflokkurinn með 22,8% fylgi í Reykjavík Suður en þurfti að sætta sig við aðeins tvo þingmenn, þau Sigríði Á. Andersen og Brynjar Níelsson.
Fyrir hinar nýafstöðnu kosningar skipti Birgir síðan yfir í Reykjavík Suður. Niðurstöður kosninganna urðu þær að flokkurinn hlaut sama fylgi í kjördæminu og fjórum árum áður, 22,8% fylgi, en þar sem Birgir var mættur til leiks þá dugði það flokknum í þrjú þingsæti í kjördæminu í ár.
Að sama skapi tapaði Sjálfstæðisflokkurinn þingsæti í Reykjavík Norður en það kom í hlut Brynjars Níelssonar að bíta í það gallsúra epli.