Kosið verður til Alþingis næsta laugardag og er því fram undan kosningavika, og því von á hinum ýmsu útspilum stjórnmálaflokkanna í baráttunni sem mörgum hefur þótt heldur litlaus og átakalítil, að minnsta kosti hingað til.
Nýjasta útspil Sjálfstæðismanna hlýtur að teljast til slíkra útspila, en í henni varar Brynjar Níelsson, frambjóðandi flokksins, við því að hann sé í baráttusæti í komandi kosningum. „Eflaust eru það frábærar fréttir fyrir marga, að þessi leiðindaskarfur sé mögulega að detta af þingi,“ segir Brynjar þá.
„Mig langar að biðja þig um þinn stuðning, og í staðinn mun ég heita því að vera áfram hæfilega leiðinlegur, viðra mínar skoðanir og vera gagnrýninn,“ segir Brynjar enn fremur, kíminn.
Auglýsingin öll er bersýnilega skot á internetímynd Brynjars, sem er þó, samkvæmt þeim sem til hans þekkja, fjarri raunveruleikanum.
Myndbandið má sjá hér að neðan.
Brynjar Níelsson skipar þriðja sætið í Reykjavík norður, en flokkurinn náði þó þremur mönnum þar inn síðast. Brynjar hafði ekki erindi sem erfiði í prófkjöri Sjálfstæðismanna nú í sumar og voru áhöld um hvort Brynjar myndi þiggja sætið sem honum bauðst. Svo fór að lokum að hann þáði þriðja sætið. Hann sat í öðru sæti í Reykjavík suður fyrir síðustu kosningar, sem er svo til öruggt sæti en þá gaf hann fyrsta sætið eftir til að jafna kynjahlutföll oddvita Sjálfstæðismönnum í kjördæmunum sex. Skiptu hann og Sigríður Á. Andersen þá á sætum. Síðar á kjörtímabilinu sagði hún af sér sem ráðherra vegna Landsdómsmálsins svokallaða og náði ekki sæti í prófkjöri Sjálfstæðismanna. Hún skipar nú heiðurssæti á lista í Reykjavík.