fbpx
Fimmtudagur 24.júní 2021
Eyjan

„Grafalvarleg“ fjárhagsstaða Ísafjarðarbæjar – Sveitarfélagið „ætti með réttu að vera komið í gjörgæslu“

Erla Hlynsdóttir
Mánudaginn 31. maí 2021 17:00

Ísafjörður. mynd/Sigtryggur Ari

Ekki missa af Helstu tíðindum dagsins í pósthólfið þitt

Lesa nánar

„Það er augljóst að fjárhagsstaða Ísafjarðarbæjar er grafalvarleg. Meirihlutinn og bæjarstjórinn þeirra virðist hafa misst alla yfirsýn á reksturinn, áhuga á verkefninu sem og þá ábyrgðartilfinningu sem fólk í þessum hlutverkum verður að hafa.“

Þetta kemur fram í bókun sem bæjarfulltrúar Í-lista lögðu fram á síðasta bæjarstjórnarfundi Ísafjarðarbæjar. Þá lagði bæjarstjóri fram til fyrri umræðu ársreikning bæjarfélagsins, stofnana hans og fyrirtækja fyrir starfsárið 2020.

Í bókun Í-listans segir ennfremur: „Flest virðist því benda til þess að fjárhagsáætlun fyrir árið 2020 hafi verið illa unnin, of lág á útgjaldahliðinni og of há á tekjuhliðinni. Við köllum því eftir betri útskýringum til að ná utan um þetta. Miðað við þá stöðu sem blasir við okkur í þessum ársreikningi, ætti sveitarfélagið með réttu að vera komið í gjörgæslu hjá Eftirlitsnefnd með fjármálum sveitarfélaga.“

Yfir 600 milljóna króna rekstrarhalli

Bæjarins besta fjallar um ársreikning Ísafjarðarbæjar og segir niðurstöðu í rekstri mun lakari en upphaflega stóð til.

Þegar tekið er saman allur rekstur sveitarfélagsins, A og B hluta stofnanir þá varð hallinn 608 m.kr. en áætlað hafði verið að afgangur 168 m.kr. yrði. Munurinn er 776 m.kr.

Laun og tengd gjöld er langstærsti útgjaldaliðurinn og var hann alls 3 milljarðar króna í fyrra.

Engin skemmtiferðaskip

Daginn eftir að fyrri umræða um ársreikninginn átti sér stað á fundi bæjarstjórnar, þann 22. maí, birti Daníel Jakobsson, formaður bæjarráðs, aðsenda grein í Bæjarins besta sem bar yfirskriftina „Bjart framunda í Ísafjarðarbæ.“

Í greininni sagði Daníel: „Rekstur síðasta árs var erfiður sem á ekki að koma á neinum óvart. COVID áhrifin komu hart niður á rekstri sveitarfélagsins og valda því að umtalsverður halli er á rekstrinum en rekstrarhalli síðasta árs nemur um 600 milljónum. Heildartekjur A og B hluta voru rétt liðlega 5 milljarðar á síðasta ári og lækka um 300 milljónir milli ára eða tæplega 6%. Tekjulækkunin milli ára er bein afleiðing af COVID faraldrinum en þar vega þyngst skerðingar á framlögum úr Jöfnunarsjóði sveitarfélaga og minni tekjur af höfninni. Tekjur hafnarinnar drógust mikið saman þar sem ferðir skemmtiferðaskipa féllu alfarið niður á síðasta ári vegna COVID.“

Ljós við enda ganganna

Þar kom ennfremur fram: „Að sjálfsögðu er enginn ánægður með að halli sé á rekstri sveitarfélagsins en það er mikilvægt að horfa til þess að um tímabundnar og óviðráðanlegar aðstæður er að ræða. Þrátt fyrir þetta er staða Ísafjarðarbæjar sterk og ekkert sem bendir til annars en við verðum fljót að vinna okkur út úr þessu ástandi. Það styttist í að við sigrumst á veirunni sem leikið hefur heimsbyggðina grátt og daglegt líf færist í fyrra horf. Ljósið við enda ganganna verður bjartara með degi hverjum og framtíðin í okkar samfélagi er björt.“

Forseti bæjarstjórnar lagði á fundi bæjarstjórnar að vísa umræðu um ársreikning 2020 til síðari umræðu í bæjarstjórn og var tillagan samþykkt með öllum atkvæðum greiddum.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Pennar

Mest lesið

Nýlegt

Eyjan
Fyrir 1 viku

Læknar senda Lilju Alfreðs í tímabundið veikindaleyfi

Læknar senda Lilju Alfreðs í tímabundið veikindaleyfi
EyjanFastir pennar
Fyrir 1 viku

„Kerfið ver sig með kjafti og klóm“

„Kerfið ver sig með kjafti og klóm“