Afglæpavæðing neysluskammta fíkniefna hefur verið áberandi umræðuefni síðustu vikurnar. Þeir sem berjast fyrir afglæpavæðingu slíkra skammta segja það til þess fallið að draga úr þeim skaða sem fíkniefni hafa á samfélagið og einstaklinganna sem þeirra neyta, andstæðingar hafa þó haldið því fram að með því að afnema refsingu við neysluskömmtum sé verið að hvetja til fíkniefnaneyslu.

Mörg ólík sjónarmið hafa heyrst í þessari umræðu og er málefnið mikið hitamál. Guðmundur Ingi Þóroddsson, formaður Afstöðu félags fanga, vill sjá umræðunni lyft á hærra plan og telur margar þær raddir sem tali gegn afglæpavæðingunni séu í raun stjórnmálamenn á atkvæðaveiðum. Hann skrifar um þetta í pistli sem birtist hjá Fréttablaðinu.

„Hver „sérfræðingurinn“ á fætur öðrum ryður sér nú fram á ritvöllinn til þess að lýsa því yfir að umræðan um afglæpavæðingu neysluskammta sé á villigötum. Þegar betur er að gáð er þetta upp til hópa fólk sem er að bjóða sig fram til þátttöku í stjórnmálum og ætlar sér að nýta bágindi þeirra sem glíma við vímuefnafíkn sér til framdráttar.“

Guðmundur segir það sorglegt að horfa á fólk berjast gegn málefni sem það myndi efalaust styðja ef það hefði kynnt sér það nægilega vel.

„Óskiljanlegt er hvers vegna gott fólk vill koma í veg fyrir að mál fái framgang sem bjargað gæti lífi barna þeirra einn daginn eða alla vega komið í veg fyrir að þau þurfi að afplána dóm í fangelsi. Og að frambjóðandi skuli nýta sér dauða fjölskyldumeðlims til þess að fá athygli í fjölmiðlum án þess að reyna af minnsta mætti að reyna setja sig í spor hinnar látnu sem frambjóðandinn elskaði svo heitt. Það kallast hræsni.“

Þarna vísar Guðmundur Ingi væntanlega til Diljár Mist Einarsdóttur, hæstaréttarlögmann og frambjóðanda í væntanlegu prófkjöri Sjálfstæðisflokksins sem hefur talað gegn frumvarpi heilbrigðisráðherra um afglæpavæðingu neysluskammta en Dilja missti elstu systur sína úr ofneyslu fyrir fjórtán árum.

Guðmundur bendir á tvö dæmi um afskipti lögreglunnar af neysluskömmtum:

„Fyrir skömmu greindi lögreglumaður frá fíkli sem seldi sig fyrir neysluskammta af fíkniefnum. Lögreglan tók skammtinn og fíkillinn gerði það eina sem honum stóð til boða, að selja sig fyrir nýjum skammti. Stórvinur minn var á reynslulausn vegna fíkniefnabrots þegar hann var farþegi í bíl sem lögregla stöðvaði. Hann fékk kvíðakast og gleypti allan pokann sinn í þeirri von að hann myndi skila sér seinna. Hann lést örfáum dögum síðar vegna þessa.“

Guðmundur segir þá sem tali gegn frumvarpinu oft rökstyðja mál sitt með handahófskenndum hugmyndum, tilfinningarökum og ranghugmyndum. Lyfta þurfi umræðunni á hærra plan.

„Lyftum umræðunni upp á hærra plan, hlustum á fólkið sem hefur reynslu á málaflokknum, heyrum hvað Frú Ragnheiður, Snarrótin, Afstaða, Félag hjúkrunarfræðinga og fleiri hafa að segja og samþykkjum fyrirliggjandi frumvarp heilbrigðisráðherra.“