Inga Sæland, formaður Flokks Fólksins, segir ríkisstjórnina vera vanhæfa í pistil sem hún skrifar í Morgunblaðið í dag. Hún sakar stjórnvöld um að „gambla“ með líf og heilsu landsmanna.
Inga vill meina að fjórða bylgja Covid-faraldursins sé rétt handan við hornið og skuli hún skella á sé það handvömm og veiklyndi ríkisstjórnarinnar að kenna.
„Sérhagsmunagæslan er dýru verði keypt þar sem gamblað er með líf okkar og heilsu eins og hverja aðra söluvöru. Einhvers staðar segir að „brennt barn forðist eldinn“ en þrátt fyrir fyrri reynslu og yfirstandandi hörmungar af Covid í heiminum þá hika íslensk stjórnvöld ekki við að kasta okkur ítrekað á sama bálið, hafa einungis bætt sprekum á eldinn svo það logi enn betur. Hið svokallaða breska afbrigði veirunnar er mun meira smitandi en það sem við áður þekkjum. Það er einmitt það sem við erum að glíma við í dag,“ segir Inga en hún er ein þeirra sem vildu loka landamærunum alveg fyrir allri ónauðsynlegri umferð.
Inga er mikill aðdáandi sóttvarnarhúsanna og vill að allir sem koma hingað til lands þurfi að dvelja þar. Hún vill meina að 90% hagkerfisins haldist gangandi ef ríkisstjórnin leggst til viðeigandi aðgerða á landamærunum.
„Stöðug áföll þar sem vanhæf stjórnvöld opna og loka á víxl fyrir æðar hagkerfisins eru að valda okkur miklu meira tjóni en ábata vegna aðgerðanna. Ekki bætir úr skák að einhverjir sitjandi ráðherrar, þingmenn og þekktir flokksmenn stærsta stjórnarflokksins, Sjálfstæðisflokks, eru sífellt að grafa undan samstöðu þjóðarinnar í sóttvörnum. Þau sá fræjum efasemda og tortryggni um þær aðgerðir sem reynt er að grípa til svo stöðva megi veiruna,“ en ætla má að þarna sé hún að ræða um þau Brynjar Níelsson og Sigríði Á. Andersen sem hafa mikið rætt efasemdir sínar á gagnsemi sóttvarnaraðgerða.
Um helgina komu upp 44 innanlandssmit og þau má rekja til tveggja aðila sem brutu sóttkvíarreglur. Hefðu einstaklingarnir verið skikkaðir í sóttvarnarhús hefði verið hægt að komast hjá þessum smitum.
„Flokkur fólksins fordæmir enn og aftur ríkisstjórn sem grímulaust tekur sérhagsmuni fárra fram yfir almannahag og teflir með því lífi okkar og heilsu í voða. Ríkisstjórn sem er ekki bær til að setja reglur sem halda svo sóttvarnalæknir geti unnið vinnuna sína. Ríkisstjórn sem gerir ekkert með vilja 94% þjóðarinnar sem kallar eftir lokun landamæranna fyrir ónauðsynlegri umferð. Slík ríkisstjórn er vanhæf ríkisstjórn,“ segir Inga að lokum.
