Bjarni Benediktsson fjármálaráðherra kynnti í dag fjármálaáætlun fram til ársins 2026. Hana má lesa hér.
Boðskapur fjármálaráðuneytisins er að tekist hafi að milda kreppuna og aðgerðir sem gripið hafi verið til í viðbragði við Covid-faraldrinum hafi skilað árangri. Í umfjöllun Fréttablaðsins um þetta segir:
„Sértækar aðgerðir á sviði ríkisfjármála drógu úr samdrætti landsframleiðslunnar um að lágmarki 100 milljarða að sögn Bjarna og niðurstöður væru betri en allar spár. „Ótvírætt merki um að aðgerðir séu að skila árangri,“ sagði hann. Alls hafi 119 milljarðar króna hafa verið settir í fjárfestingar- og uppbyggingaátak til að bregðast við efnahagssamdrætti vegna COVID-19.
Fram kemur á vef Stjórnarráðsins að „aðgerðir stjórnvalda vegna heimsfaraldurs kórónuveiru hafa skilað miklum árangri og útlitið fram undan er bjartara en gert var ráð fyrir í fyrra. Ráðstöfunartekjur heimilanna jukust árið 2020 og reyndist samdráttur umtalsvert minni en áætlað var. Þetta eru meginatriðin í nýrri fjármálaáætlun fyrir 2022-2026.“
Tekist hafi að draga úr áhrifum kreppunnar sem COVID-19 fylgir með ýmisskonar stuðningsúrræðum fyrir rekstraraðila og einstaklinga. Gert er ráð fyrir í fjármálaáætluninni að hagkerfið taki fljótt við sér eftir samdrátt í fyrra og markmið stjórnvalda sé „að styðja við vöxt efnahagsins og stöðva skuldasöfnun.“
Í fjármálaætlunni segir að hægja muni á hagvexti vegna sérstakra aðhaldsaðgerða sem hefjist árið 2023. Atvinnuleysi verði viðvarandi næstu ár.
Jóhann Páll Jóhannsson, frambjóðandi Samfylkingarinnar, lítur fjármálaáætlunina ekki svona björtum augum. Hann bendir á að mikið atvinnuleysi sé í framtíðarspám ríkisstjórnarinnar og það sé vegna þess að hún sé með skuldastöðu ríkisins á heilanum og hafi ekki kjark til að beita ríkisfjármálunum til að efla atvinnu, þess í stað sé sultarólin hert. Hann gefur hagstjórn ríkisstjórnarinnar lága einkunn í eftirfarandi pistli:
„Tókst að milda kreppuna segja þau, en samt er nú gert ráð fyrir enn meira atvinnuleysi en spáð var þegar síðasta fjármálaáætlun birtist í október – að meira en 11 þúsund manns verði ennþá án vinnu árið 2023.
Og einmitt þá vill ríkisstjórnin grípa til sérstakra aðhaldsaðgerða í ríkisfjármálum til viðbótar við almennar aðhaldskröfur sem verða í gildi þangað til og þannig „hægja á hagvexti“ eins og er viðurkennt í greinargerð fjármálaáætlunar.
Hvað ef efnahagsþróun verður lakari en ríkisstjórnin vonast eftir? Jú, þá á að herða sultarólina enn frekar, jafnvel með árlegum 50 milljarða aðhaldsráðstöfunum frá 2023 til 2025.
Samtals yrði sá niðurskurður tvöfalt meiri en umfang „sérstaka fjárfestingarátaksins“ sem á að framkvæma frá 2021-2023 (en gengur ofboðslega illa að koma almennilega í gang, sbr. sláandi tölur um samdrátt í opinberri fjárfestingu).
Ríkisstjórn KJ er með skuldahlutföll ríkissjóðs á heilanum, treystir sér ekki til að beita ríkisfjármálunum af festu til að skapa störf og virðist ekki skilja að besta leiðin til að ná jafnvægi í ríkisfjármálum er einmitt að fjölga störfum, verja mannauð og auka verðmætasköpun.
Þetta er vond hagstjórn sem elur á ójöfnuði og stöðnun.
187 dagar í kosningar og þá getum við breytt til.“
https://www.facebook.com/jpjohannsson/posts/10221862548105888