„Þrátt fyrir að hafa skrifað ótal margar greinar um fangelsismál og málefni fanga þá eru enn of margir sem haldnir eru fordómum. Innan okkar flokks gladdist til dæmis ágæt eldri kona yfir því að ég hefði ekki fengið sæti á lista. Konan breytti reyndar texta sínum nokkrum sinnum, hneykslaðist og gekk meira að segja svo langt að segjast ekki viss um hvort öruggt væri að viðra skoðun sína á mér. Ég velti fyrir mér hvort ég ætti að bjóða umræddri konu í kaffispjall en eflaust tæki hún því sem ógnun,“ segir Guðmundur Ingi Þóroddsson, formaður Afstöðu, í ávarpi til stuðningsmanna sinna sem hann birtir í lokuðum Facebook-hópi í gær.

Konan mun hafa látið þessi orð falla í lokuðum Facebook-hópi Samfylkingarinnar. Þar segir konan að hún sé sátt við að einstaklingur sem fékk 12 ára fangelsisdóm hafi ekki verið valinn á framboðslista Samfylkingarinnar. Konan tekur þó fram að hún telji ekki að fólk sem fær einhvern tíma dóm eigi ávallt að koma að lokuðum dyrum í samfélaginu. Það sé hins vegar mikill munur á því að vera valinn til setu á Alþingi og að vera útskúfaður.

Nokkur titringur hefur verið vegna framboðsmála Samfylkingarinnar en mál Guðmundar hefur þar sérstöðu. Guðmundur er á reynslutíma eftir að hafa afplánað meirihluta dóms síns vegna fíkniefnasmygls. Hann hefur unnið ötullega að hagsmunamálum fanga undanfarin ár og taldi mikilvægt að þeir ættu rödd á Alþingi. Guðmundur telur kosningalögin vera skýr og samkvæmt þeim hafi hann verið kjörgengur. Sú ákvörðun að veita honum ekki sæti á lista byggi á ruglingi á milli reynslulausnar og reynslutíma en Guðmundur er á reynslutíma núna.

Guðmundur hefur verið boðaður á fund í Stjórnskipunar- og eftirlitsnefnd Alþingis til að ræða um kjörgengi einstaklinga. Frumkvæði að fundinum átti Andrés Ingi Jónsson, sem nýlega gekk til liðs við þingflokk Pírata.

Í ávarpi sínu til stuðningsmanna segist Guðmundur ætla að starfa áfram í Samfylkingunni og hann sé ánægður með þá framboðslista sem Samfylkingin hafi stillt upp í Reykjavík.