Þingmaðurinn og þingflokksformaðurinn Bjarkey Olsen Gunnarsdóttir laut í lægra haldi fyrir varaþingmanninum Óla Halldórssyni í baráttunni um fyrsta sæti á lista Vinstri hreyfingarinnar – græns framboðs í Norðausturkjördæmi. Bjarkey er í öðru sæti listans, rétt eins og fyrir síðustu kosningar en þá var í fyrsta sæti Steingrímur J. Sigfússon, sem hefur ákveðið að hætta á þingi.
Þrjú sóttust eftir því að leiða listann, þau Bjarkey, Óli og Ingibjörg Þórðardóttir, varaþingmaður og framhaldsskólakennari.
13.-15. febrúar fór fram rafrænt forval hjá Vinstri hreyfingunni grænu framboði í Norðausturkjördæmi. Valið var í efstu fimm sæti á framboðslista hreyfingarinnar í alþingiskosningunum sem fram fara í haust.
Niðurstaða forvalsins er eftirfarandi:
12 voru í framboði
Á kjörskrá voru 1042
Atkvæði greiddu 648
Kosningaþáttaka var 62%
Auðir seðlar og ógildir voru 0
Kjörstjórn leggur fram lista með 20 frambjóðendum fyrir kjördæmisþing til samþykktar í samræmi við lög og stefnu hreyfingarinnar.