Kaflar úr áður óbirtum skjölum tengja kínverska leiðtoga beint við aðgerðir gegn Úígúrum í Xinjiang héraðinu en þeir hafa sætt ofsóknum af hálfu kínverskra yfirvalda. Úígúrar eru múslimskur minnihlutahópur sem býr aðallega í Xinjiang. Skjölin hafa verið birt á netinu en um þrjár ræður, sem Xi Jinping forseti flutti í apríl 2014 um öryggismál, mannfjöldastjórnun og þörfina á að refsa Úígúrum, er að ræða. Sum skjölin eru merkt sem háleynileg. Þeim var lekið til þýska fræðimannsins Adrian Zenz.

The Guardian skýrir frá þessu. Fram kemur að í skjölunum sé kallað eftir því af hálfu kommúnistastjórnarinnar að Úígúrar verði endurmenntaðir og fluttir til annarra svæða til að koma á jafnvægi á milli fjölda þeirra og Han Kínverja í Xinjiang.

Zenz segir að skjölin séu mjög mikilvæg því þau sýni margar tengingar á milli æðstu leiðtoga Kína árið 2014 og þess sem hefur gerst í Xinjiang. Þar hafa múslimar verið sendir í fangabúðir, sem kínversk stjórnvöld segja vera endurmenntunarbúðir, þeir hafa verið látnir vinna þrælkunarvinnu og einnig hafa borist fregnir af ófrjósemisaðgerðum á þeim.

Zenz segir að skjölin sýni langtímafyrirætlun ráðamanna um að fremja menningarlegt þjóðarmorð til að tryggja yfirráð kommúnistaflokksins.

Uyghur Tribunal, sem er óháður dómstóll staðsettur á Bretlandi,  fékk gögnin í september en þau hafa ekki verið birt í heild til að vernda uppljóstrarann.