Grafíski hönnuðurinn Krista Hall hefur verið ráðin til starfa hjá Brandenburg auglýsingastofu. Krista hefur mikla reynslu og hefur getið sér gott orð í faginu. Hún útskrifaðist í grafískri hönnun frá Listaháskóla Íslands árið 2014. Eftir nám var hennar fyrsta stóra verkefni að hanna og skapa teiknaðan heim fyrir tölvuleikinn og appið Mussila sem ætlað er að kenna börnum tónlist. Þá hefur Krista um árabil haft umsjón með útliti á sælkerahátíðinni Food and Fun. Árið 2018 réð Krista sig til starfa hjá Tvist auglýsingastofu og tók þar stöðu umsjónarhönnuðar (e. Art Director) fyrr á þessu ári. Krista hefur nú verið ráðin á Brandenburg, í stöðu umsjónarhönnuðar.

Hrafn Gunnarsson er hugmynda- og hönnunarstjóri á Brandenburg. „Það er mikill fengur að fá Kristu til liðs við okkur á Brandenburg. Hún er öflugur og hugmyndaríkur hönnuður og er strax farin að láta til sín taka á stofunni. Krista smellpassar inn í hópinn og fellur vel að hugmyndafræðinni okkar á Brandenburg. Við leggjum mikla áherslu á árangursdrifna hugmyndavinnu sem við teljum að sé lykilatriði í farsælli uppbyggingu á vörumerkjum. Þar er Krista strax að koma virkilega sterk inn,“ segir Hrafn.

Hjá Brandenburg starfa tæplega 40 sérfræðingar á sviði vörumerkjaráðgjafar, hönnunar, hugmyndavinnu og textagerðar auk þess að sjá um birtingar, kaup og ráðgjöf gegnum snjallbirtingafyrirtækið Datera.