Eins og kunnugt er þá yfirgaf Birgir Þórarinsson nýkjörinn þingmaður Miðflokksins flokkinn nýlega og gekk til liðs við þingflokk Sjálfstæðisflokksins. Þetta er umfjöllunarefni í pistli sem Jón Steinar Gunnlaugsson, hæstaréttarlögmaður og fyrrum hæstaréttardómari, ritar í Morgunblaðið í dag undir fyrirsögninni „Stuðningur við siðleysi“.

Jón Steinar segir að ljóst sé að Birgir, sem hann nefnir ekki á nafn í pistlinum, hafi boðið sig fram undir fölsku flaggi. Hann hafi ekki skýrt þetta með öðru en gamalli atburðarás sem lá fyrir löngu fyrir kosningarnar. „Hann var einfaldlega að svindla á kjósendum, þegar hann lét kjósa sig fyrir flokk sem hann yfirgefur svo strax að kjörinu loknu vegna atvika sem lágu fyrir áður en kosið var,“ segir Jón Steinar.

Hann segist síðan halda að hann myndi varla nenna að stinga niður penna til þess eins að gagnrýna hátterni Birgis en það sé hins vegar ástæða til að staldra við og spyrja af hverju Sjálfstæðisflokkurinn taki þátt í þessu með Birgi.

„Með því háttalagi gerist sá flokkur meðsekur í háttsemi mannsins. Komið hefur fram í fréttum að enginn þingmanna flokksins greiddi atkvæði gegn því að taka við honum. Þingflokkurinn hefur þá upplýst að hann er til í að taka þátt í siðlausum brotum annarra ef hann aðeins telur sig hagnast á því – í þessu tilviki með því að fá viðbótaratkvæði á þingi,“ segir Jón Steinar og bætir við að þetta sé ekki gott.