Áslaug Arna Sigurbjörnsdóttir dómsmálaráðherra sækist eftir fyrsta sæti á lista Sjálfstæðisflokksins í sameiginlegu prófkjöri Reykjavíkurkjördæmanna í júní. Guðlaugur Þór Þórðarson utanríkisráðherra sækist einnig eftir þessu sæti og skipar fyrir efsta sæti í öðru kjördæmanna.
Fréttatilkynning Áslaugar Örnu um málið er eftirfarandi:
„Ég sækist eftir 1. sæti á lista Sjálfstæðisflokksins í sameiginlegu prófkjöri Reykjavíkurkjördæmanna, sem fer fram dagana 4. – 5. júní nk.
Í störfum mínum síðastliðin ár hef ég lagt mig fram um að nýta þau tækifæri sem ég hef sóst eftir og fengið til að vinna að því að hafa góð áhrif á samfélag okkar og tryggja réttindi einstaklinga. Innan Sjálfstæðisflokksins, á Alþingi og sem dómsmálaráðherra. Stjórnmál eiga að snúast um það að gera samfélagið betra og réttlátara þannig að sem flestir geti nýtt þau tækifæri sem til staðar eru. Við eigum að stefna að því að einfalda líf fólks og að kerfið lagi sig að fólki en fólk þurfi ekki að laga sig að kerfinu.
Ég vil byggja á bjartsýni til framtíðar, nýta góðar hugmyndir og raunhæfar lausnir, tryggja öryggi okkar og samkeppnishæfni landsins og sameina ólík sjónarmið í samfélaginu. Það eru mikilvæg verkefni framundan en á sama tíma bíða okkar enn fleiri tækifæri sem við þurfum að grípa.
Það þarf öflugt fólk í forystusveit stjórnmálanna og ég býð fram krafta mína til að leiða Sjálfstæðisflokkinn í Reykjavík í komandi kosningum.
Áslaug Arna var skipuð dómsmálaráðherra 6. september 2019. Hún hefur verið alþingismaður fyrir Sjálfstæðisflokkinn frá 2016 og gegndi formennsku í allsherjar- og menntamálanefnd Alþingis, sat í efnahags- og viðskiptanefnd og gegndi formennsku í Íslandsdeild NATO. Síðar gegndi hún formennsku í utanríkismálanefnd Alþingis og formennsku í Íslandsdeild Alþjóðaþingmannasambandsins.
Árið 2015 var hún kjörin ritari Sjálfstæðisflokksins og hafði áður gegnt formennsku í Heimdalli, setið í stjórn SUS og miðstjórn Sjálfstæðisflokksins.“
