Bjarni Benediktsson fjármálaráðherra hefur sent til umsagnar drög að frumvarpi um svokallað stafrænt pósthólf. Drögin eru aðgengileg á samráðsgátt stjórnvalda.
Í drögunum kemur fram að málið er liður í aðgerðaráætlun ríkisstjórnar um að byggja upp stafræna þjónustugátt á island.is. Þar eiga landsmenn að geta nálgast þjónustu hins opinbera og sinnt erindum gagnvart sínum gagnvart stjórnvöldum á einum stað. Stefnir ríkisstjórnin að því að meginboðleið milli ríkis og þegna þess verði stafræn.
Í frumvarpinu er gert ráð fyrir að veita stjórnvöldum heimild fyrir því að senda gögn til einstaklinga og lögaðila með stafrænum hætti. Þannig mun hver kennitala eiga sitt stafræna pósthólf. Þá verða réttaráhrif þess að senda gögn með þessum hætti lögð að jöfnu við það þegar bréf er í dag sent á lögheimili viðkomandi. Þegar gögnin eru aðgengileg í pósthólfi viðtakanda munu gögnin teljast hafa verið komið á framfæri við viðtakanda.
Segir í frumvarpinu að: „Með áformum að frumvarpi er verið að auka þjónustu við almenning og fyrirtæki þar sem stefnt er að því að hægt verði að nálgast öll skjöl frá stjórnvöldum á einum stað sem leiðir til einföldunar, aukins hagræðis og tímasparnaðar fyrir samfélagið í heild.“