Ljóst þykir að samstöðumómælin með #blacklivesmatter hreyfingunni á Austurvelli í gær sprengdu takmarkanir samkomubannsins sem í gildi er í landinu, en þar er gert ráð fyrir að hámarki 200 manns megi koma saman. Fréttablaðið hefur meðal annars fjallað um þetta. Samkvæmt upplýsingum frá lögreglu voru um 3.500 manns á fundinum en hámarksfjöldi sem má safnast saman núna er 200 manns.
Fundurinn þótti afar vel heppnaður og í hugum flestra er málstaðurinn einstaklega góður. Engu að síður hefur mannsöfnuðurinn vakið gagnrýni og Baldur Borgþórsson, borgarfulltrúi Miðflokksins, bendir á að svo margir hafi verið búnir að boða sig á fundinn að borgaryfirvöld hafi mátt vita að takmarkanir samkomubanns yrðu rofnar. Hann skrifar:
„Já, það er margt skrýtið í kýrhausnum.
Á sama tíma og ekki er leyft að halda 10 manna fundi í ráðum borgarinnar nema í formi fjarfunda:
„Skipuleggjendur fengu leyfi frá Reykjavíkurborg til að vera með þennan útifund“
Þúsundir höfðu þá þegar staðfest komu sína og því ljóst að um skýlaust brot á fyrirmælum sóttvarnarlæknis yrði að ræða.
Nú þegar fyrir liggur að gefnar hafa verið út háar sektir á aðila fyrir margfalt minni brot , verður sérstaklega fróðlegt að fylgjast með framvindu þessa máls.“