Þingmenn Miðflokksins hættu málþófi sínu í gær eftir að samningar náðust við þá um að fjárlaganefnd afgreiði sérstakt framhaldsnefndarálit um frumvarp tengt Borgarlínu. Með því er komið til móts við sjónarmið flokksins. En þingmenn Miðflokksins höfðu ekki fyrr lokið málþófi sínu en Píratar hófu málþóf og hófu að ræða orkumál af krafti. Ástæðan er að þeir vilja fá mál sitt um afglæpavæðingu fíkniefnaneyslu tekið til atkvæðagreiðslu fyrir þinglok en stjórnarmeirihlutinn hyggst leggja fram tillögu um að málinu verði vísað til ríkisstjórnarinnar til frekari meðferðar. Samkomulag um þinglok strandar því á frumvarpi um afglæpavæðingu fíkniefnaneyslu.

Fréttablaðið skýrir frá þessu. Fram kemur að frumvarpi um skipun sendiherra verði frestað fram á haust en það hefur mætt mikilli andstöðu stjórnarandstöðunnar og umsagnaraðila. Unnið er að breytingum á umdeildu samkeppnislagafrumvarpi til að liðka fyrir samningum um þinglok. Fréttablaðið hefur eftir Birgi Ármannssyni, þingflokksformanni Sjálfstæðisflokksins, að samningar verði ekki í höfn fyrr en allir eru komnir um borð. Nú sé fyrirstaðan hjá Pírötum. Þeim standi til boða að málið verði tekið á dagskrá en þeir vilji einnig fá að ráða afgreiðslu málsins og þar strandi á samningum sem hafi að mestu náðst á milli þingflokka.

„Við viljum bara að annaðhvort verði frumvarpið samþykkt og gert að lögum eða þingmenn hafni því í atkvæðagreiðslu.“

Hefur Fréttablaðið eftir Halldóru Mogensen, þingflokksformanni Pírata.