Héraðsfréttablaðið Skarpur, sem stofnað var árið 2002, kemur út í síðasta sinn í dag. Mun það sameinast Vikudegi á Akureyri undir nafninu Vikublaðið, sem kemur út í næstu viku.
Frá þessu greinir Jóhannes Sigurjónsson, ritstjóri Skarps, á Facebooksíðu sinni og rekur sögu blaðsins stuttlega:
„31. júlí n.k. eru liðin 41 ár frá því fyrsta tölublað Víkurblaðsins kom út á Húsavík á því herrans harðindaári 1979. Frá árinu 1997 og allt til ársins 2001, var svo blaðið í samstarfi við og hluti af Degi á Akureyri. Og þegar það blað lagði upp laupana, hóf Víðir Pétursson útgáfu á Skarpi á Húsavík og fyrsta tölublað Skarps kom út 25. janúar 2002.“
Jóhannes greinir einnig frá því að hann muni láta af störfum hjá Ásprenti/ Stíl á Akureyri að eigin frumkvæði um næstu mánaðarmót og þar með ljúki 41 árs blaðamannaferli hans, þó eflaust muni hann stinga niður penna í hið nýja blað.
„Frá upphafi hef ég verið viðloðandi og lengst af ritstýrt þessum blöðum í samtals 41 ár og auðvitað mál að linni og tími til kominn og klárlega þó fyrr hefði verið – út frá öllum skynsamlegum mælikvörðum. Enda ég löngu kominn fram yfir síðasta söludag, (sjá mynd) og er í raun opinberlega varla til, því ég á ekki snjallsíma og er ekki einu sinni með rafræn skilríki!“