Vigdís Hauksdóttir, borgarfulltrúi Miðflokksins, vill að Lögreglan á höfuðborgarsvæðinu og Almannavarnir höfuðborgarsvæðisins gefi umsögn út frá öryggissjónarmiðum um þá ákvörðun borgarstjórann að loka Laugavegi frá Frakkastíg að Lækjargötu. Terlur hún að ef áætlanir um þetta gangi eftir gerði aðgengi sjúkrabíla, slökkviliðsbíla og lögreglu skert.
Vigdís lagði fram svohljóðandi tillögu á fundi Skipulags- og samgönguráðs í dag:
„Tillaga:
Lagt er til að fá álit/umsögn frá lögreglunni á höfuðborgarsvæðinu og almannavörnum höfuðborgarsvæðisins hvað varðar þá ákvörðun að loka Laugaveginum frá Frakkastíg að Lækjargötu.
Greinargerð:
Gangi þessar áætlanir eftir er ljóst að aðgengi sjúkrabíla, slökkviliðsbíla og lögreglu verður mjög skert, því meirihlutinn boðar að fjölga eigi mjög útisvæðum fyrir utan veitingastaði á þann hátt að hægt verði að koma fyrir stólum, borðum, blómakerjum og bekkjum á göngugötunni sem til verður.
Þessi tillaga snýst um að hægt verði að bjarga mannslífum þegar vá ber að, s.s. bruni, heilsufall, vopnuð rán á opnunartíma verslana- og veitingahúsa og líkamsárása.“
Tillögunni var vísað frá og er Vigdís ósátt við þá ákvörðun. Í samtali við DV sagði Vigdís:
„Þessari tillögu var vísað frá af meirihlutanum. Öryggissjónarmið eru að engu höfð. Það er grafalvarleg staðreynd. Margbúið er að vara borgaryfirvöld við aðgengisleysi þessara aðila í lokunarþráhyggju meirihlutans. Ekki er hlustað á þær raddir en rétt er að geta þess að Dagur B. Eggertsson, borgarstjóri er formaður stjórnar Slökkviliðsins á höfuðborgarsvæðinu.
Ég kem til með að flytja hana í borgarráði á morgun og borgarstjórn á þriðjudaginn.“
