Ragnar Þór Ingólfsson, formaður VR, spyr í nýrri Facebookfærslu hvort Íslendingar vilji virkilega fara þá leið að skipta Icelandair út fyrir önnur fyrirtæki sem hafi ekki hag launafólks á Íslandi fyrir brjósti. Aðilar sem veigri sér ekki við að sækja vinnuafl til útlanda þar sem launakostnaður sé lægri.
„Rætt hefur verið um að flugfélögin Bláfugl (e. Bluebird Nordic) og Play geti fyllt í skarðið fari svo að Icelandair verði gjaldþrota. Þannig væri hægt að halda uppi flugsamgöngum til og frá landinu tímabundið.
Er þetta virkilega leiðin sem við viljum fara?“
Fá hér flugfélög í skattaskjólsbraski sem veigra sér ekki við að úthýsa störfum til Indlands eða Filippseyja eða hverra landa sem réttindi og laun eru lægst fyrir mestu vinnuna? Setja svo restina á gerfiverktöku í gegnum starfsmannaleigur?“
Ragnar Þór hefur gagnrýnt Icelandair harðlega undanfarið vegna framgöngu þeirra gagnvart starfsmönnum sínum og kjaramálum þeirra, en líkt og áður hefur verið greint frá þá krefst félagið þess að stærstu þrjár starfsstéttir félagsins, flugfreyjur, flugþjónar og flugvirkjar, sættist á töluverða kjaraskerðingu. Flugmenn og flugvirkjar hafa samið við Icelandair en flugfreyjur eru enn í viðræðum og vilja ekki gefa eftir réttindi til frambúðar. Ragnar segir að þó hann hafi vissulega gagnrýnt félagið, þá komi hann samt með að styðja björgun félagsins um leið og réttindi félagsmanna VR í starfi hjá félaginu séu tryggð.
„Þó ekki sé út frá flugöryggis sjónarmiðum hlýtur metnaður okkar að vera meiri en þetta.
Ég hef gagnrýnt stjórnendur Icelandair harðlega fyrir framgöngu sína gagnvart starfsfólki félagsins en mun beita mér af krafti fyrir björgun þess þegar stjórnendur hafa tryggt framtíð félagsmanna okkar án þess að gengið verði á réttindi þeirra og launakjör.“
