Þann 2. apríl voru fjögur leikskólabörn og 33 grunnskólanemendur smitaðir af kórónuveirunni hér á landi. Þetta kemur fram í svari skóla- og frístundasviðs við fyrirspurn Morgunblaðsins, sem greinir frá þessu í dag.
Alls 28 starfsmenn leikskóla voru einnig greindir með smit og 18 starfsmenn grunnskóla. Smit hafði komið upp í 11 leikskólum og 20 grunnskólum þann 2. apríl.
Þá voru 355 grunnskólanemendur í sóttkví og 3.351 nemandi var í leyfi frá skóla að ósk foreldra.
„Ástæðurnar geta verið mýmargar; persónulegar eða tengdar heilsufari barnanna eða einhverra á heimilinu. Við höfum fullan skilning á því,“
er haft eftir Skúla Helgasyni, borgarfulltrúa Samfylkingarinnar og formanni ráðsins.