„Sóttvarnarlæknir hefur sagt að það sé óþarfi að nota grímur, nema maður sé að hjúkra covid-19 sjúklingi. Það er augljóslega ekki rétt,“
segir viðskiptafræðingurinn og fyrrverandi þingmaður Framsóknarflokksins, Frosti Sigurjónsson, sem hefur verið duglegur að gagnrýna stjórnvöld vegna viðbragða hennar við Covid-19 faraldrinum.
Hann leggur áherslu á notkun andlitsgríma til að verjast veirunni,og segir þær geta gert gæfumun, þar sem veiran geti „svifið innanhúss“ í allt að þrjá klukkutíma og borist með þeim sem eru einkennalausir. Þannig berist hún með tali, útöndun og söng, ekki bara með hósta og hnerra:
„Í löndum Asíu nota nær allir grímur til að draga úr fjölda veira sem berast ofan í lungu, og ekki síður til að forðast að dreifa óvart veirum með útöndun. Gríma útilokar að fingur fari upp í vitin ómeðvitað. Á meðan lífshættuleg veira er í umhverfi okkar og þúsundir ógreindra smitbera í samfélaginu getur gríma gert gæfumun,“
segir Frosti og bætir við að almenningur eigi ekki að nota bestu grímurnar, heldur þær næst-bestu, því heilbrigðisstarfsfólk þurfi þær bestu:
„Auðvitað viljum við að hjúkrunarfólk fái bestu grímurnar, en við getum notað þær næst bestu. Jafnvel einfaldar grímur geta fækkað þeim veirum sem sleppa ofan í lungun. Allar grímur stoppa fingurnar í því að fara ómeðvitað í vitin. Notum grímur.“
Veiran berst samt ekki um andrúmsloftið meðal almennings í þrjá tíma, líkt og Frosti talar um. Í þeim tilfellum er verið að vísa til aðstæðna sem geta komið upp á sjúkrahúsum, en ekki úti í samfélaginu, líkt og lesa má um í grein sem afsannar ýmsar mýtur sem komist hafa á kreik um kórónavírusinn.
„Það hefur í sjálfu sér ekki mikið segja að nota andlitsgrímu til að verja sjálfan sig,“ sagði Þórólfur þann 16. mars á blaðamannafundi og benti á að grímur og hanskar gætu veitt falskt öryggi.
Grímurnar virkuðu aðeins í ákveðinn tíma, þegar þær yrðu blautar í gegn gerðu þær ekkert gagn. Þórólfur hefur áður sagt að sumar grímur loki ekki alveg fyrir nef og munn, og því geti veiran smogið sér inn um hliðarnar á grímunum.
Heilbrigðisstarfsfólk er hinsvegar með þróaðri grímur sem notaðar eru til að sinna smituðum sjúklingum, auk þess sem smitaðir fá slíkar grímur í sumum tilfellum, samkvæmt Ölmu Möller landlækni.
Samkvæmt frétt The Guardian geta andlitsgrímur veitt fimmfalda vernd í samanburði við engar grímur, samkvæmt rannsóknum, en aðrar rannsóknir benda einnig til þess að það hlutfall sé lægra.
Á vef landlæknis segir um grímunotkun:
„Grímur nýtast best þegar veikir nota þær til að hindra dreifingu dropa en einnig þegar náið samneyti er óhjákvæmilegt, s.s. fyrir heilbrigðisstarfsmenn eða aðra viðbragðsaðila þegar þeir hlúa að veikum.“
Á vef Alþjóðaheilbrigðisstofnunarinnar (WHO) er aðeins ráðlagt að nota grímur í nánd við smitaðan einstakling. Minnt er á að grímurnar séu einnota og ef þú sjálfur sért ekki smitaður eða að hjúkra smituðum, þá sértu í raun að sóa þessari takmörkuðu auðlind sem grímurnar eru.