Efnahagslegar aðgerðir í fyrsta áfanga ríkisstjórnarinnar munu kosta 230 milljarða króna, jafngildi 8 prósenta af landsframleiðslu. Brúarlán til fyrirtækja í rekstarvanda og sérstakur barnabótaauki eru á meðal þeirra efnahagslegu aðgerða sem ríkisstjórnin hefur boðað.
Þau Katrín Jakobsdóttir, forsætisráðherra, Bjarni Benediktsson, fjármála- og efnahagsráðherra og Sigurður Ingi Jóhannsson, samgöngu- og sveitarstjórnarráðherra, boðuðu til blaðamannafundar í Norðurljósum í Hörpu í dag. Til umfjöllunar á fundinum voru fjölþættar aðgerðir stjórnvalda upp á um níutíu milljarða króna, sem eru viðbrögð vegna kórónuveirufaraldursins sem nú geisar hér á landi.
Stjórnvöld munu ráðast í fleiri aðgerðir sem ætlað er að ýta undir eftirspurn og örva efnahagslífið, en fyrirtækjum verður gefinn kostur á að fresta greiðslum opinberra gjalda til næsta árs til að bæta lausafjárstöðu í atvinnurekstri og gistináttaskattur verður afnuminn til ársloka 2021.
Útlánasvigrúm verður aukið með lækkun bankaskatts og ríkisábyrgð á lánum til lífvænlegra fyrirtækja, sem er ætlað að auðvelda þeim að standa í skilum, sérstaklega vegna launagreiðslna.
„Með þessu erum við að fylgja fordæmi margra Evrópuríkja sem hafa staðið fyrir því að ríkið í þessu tilfelli munum við gera það gegnum seðlabankann – tryggir ákveðna ábyrgð á lánveitingum fjármálafyrirtækja til fyrirtækja,“ sagði Katrín á fundinum.
Stjórnvöld munu í krafti hlutastarfaleiðarinnar greiða allt að 75 prósent launa starfsfólks sem lækkar í starfshlutfalli, að hámarki 700 þúsund krónur, og gera þannig launafólki og atvinnurekendum kleift að halda ráðningarsambandi. Úrræðið gildir næstu tvo og hálfan mánuð en reynslan af úrræðinu verður endurmetin í maí.
Farið verður í sérstakt 20 milljarða króna fjárfestingarátak árið 2020, þar sem hið opinbera og félög þess setja aukinn kraft í samgöngubætur, fasteignaframkvæmdir, og upplýsingatækni, auk þess sem framlög verða aukin í vísinda- og nýsköpunarsjóði. Fram kom á fundi ráðherranna að inntak þess átaks verður nánar kynnt innan skamms.