fbpx
Miðvikudagur 12.ágúst 2020
Eyjan

Samherjatogari kyrrsettur í krafti laga um skipulagða glæpastarfsemi – Gamla sektin greidd í reiðufé

Ritstjórn Eyjunnar
Föstudaginn 7. febrúar 2020 13:42

Ekki missa af Helstu tíðindum dagsins í pósthólfið þitt

Lesa nánar

Heinaste, risatogari í eigu Samherja, var kyrrsettur í morgun. Kjarninn greinir frá og segist hafa heimildir fyrir því að lögreglan hafi kyrrsett skipið á ný í morgun á grundvelli laga um skipulagða glæpastarfsemi.

Skipið er í eigu Esju Holding, sem Samherji er meirihlutaeigandi í. Það var kyrrsett í nóvember á grundvelli laga um ólöglegar fiskveiðar á hrygningasvæði við strendur Namibíu og var skipstjórinn Arngrímur Brynjólfsson dæmdur til sektar á miðvikudag, en hann hafði setið í farbanni síðan í nóvember.

Kjarninn segir að sektin, sem hljóðaði upp á um átta milljónir króna, hafi verið greidd í reiðufé eftir að dómstólinn ytra fór fram á það. Hafi upphæðin verið sótt í bankann meðan Arngrími var gert að halda kyrru fyrir í réttarsalnum á meðan. Fékk hann í kjölfarið frelsi sitt og vegabréf og var kyrrsetningu Heinaste aflétt.

Kyrrsetningin í morgun mun vera tímabundin meðan yfirvöld vinna að formlegri kröfugerð sinni, en yfirvöld fóru fram á í byrjun þessa árs að togarinn yrði gerður upptækur. Þeim kröfum var vísað frá dómi á miðvikudag.

Samherji sagði í tilkynningu í gær að unnið væri að því að gera togarann út í Namibíu og hann yrði leigður út þar ytra. Þá ætlaði Samherji að tryggja sem flestum úr áhöfninni áframhaldandi vinnu eftir fremsta megni, en kyrrsetningin í morgun mun vafalaust tefja þau áform.

Sjá einnig: Björgólfur um dóminn yfir Arngrími í Namibíu – „Þetta skapar ný tækifæri“

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Í vikunni