Borgarstjórn Reykjavíkur mælist með minnsta traust almennings í Þjóðarpúlsi Gallup þar sem viðhorf til stofnana hins opinbera er mælt. Er þetta annað árið í röð sem borgarstjórn Reykjavíkur rekur lestina í Þjóðarpúlsi Gallup.
Þann 1. febrúar árið 2018 mældist traust almennings á borgarstjórn Reykjavíkur 24 prósent í Þjóðarpúlsi Gallup.
Ári síðar, þegar nýr meirihluti hafði verið myndaður eftir kosningar í maí 2018, féll traustið niður í 16 prósent og mælist í nýjum Þjóðarpúlsi sem gefinn var út í dag, 17 prósent.
Traustið á borgarstjórn hefur minnst mælst níu prósent í mælingum Gallup, en það var árið 2008. Fór það hæst upp í 31 prósent árin 2014 og 2015, en það féll strax árið 2016 niður í 19 prósent.
Sveitastjórnarkosningar fóru fram í maí árið 2018. Þar fékk Sjálfstæðisflokkurinn meirihluta atkvæða, eða 30.8 prósent. Næstflest atkvæði fékk Samfylkingin, eða 25.9 prósent.
Samfylkingu tókst þó að mynda meirihluta með VG, Pírötum og Viðreisn. Í minnihluta sitja Sjálfstæðisflokkurinn, Miðflokkurinn, Flokkur Fólksins og Sósíalistaflokkur Íslands.
Borgarmálin hafa verið ansi fjörug á kjörtímabilinu og mest áberandi hefur verið framúrkeyrsla borgarinnar á kostnaði ýmissa verkefna þar sem bragginn við Nauthólsveg fór fremstur í flokki. Þá hafa starfsmannamál Orkuveitunnar og dótturfélaga hennar verið áberandi, rekstur Sorpu og kjaradeila Reykjavíkurborgar við Eflingu, svo stiklað sé á stóru.